Sigurimi i Cilësisë është pjesë e rëndësishme e projektit ALLED2 duke qenë një nga elementet kyçe në kornizën e politikave të BE-së.
Qëllimi specifik i ALLED2 është që ta forcojë cilësinë dhe relevancën e programeve arsimore dhe aftësuese për tregun e punës dhe që ta mbështetë përshtatjen e kornizës legjislative dhe të mekanizmave, si një parakusht për rritjen e punësimit.
Në dy vitet e fundit u mbajtën programe trajnimi në 20 shkolla me qëllim të rritjes së cilësisë në këto shkolla.
Ndërsa sot u mbajt ceremonia e certifikimit të 39 drejtorëve e koordinatorëve dhe 14 trajnerë që kanë zhvilluar trajnimet, ceritifikimi u bë nga Ministria e Arsimit dhe projekti ALLED2.
Ministrja Nagavci tha se ky projekt kishte për qëllim përmirësimin e cilësisë në shkolla profesionale.
“Sigurimi i cilësisë, përveç se është një element kryesor i kornizës politike të BE-së për arsimin dhe aftësimin profesional, është i rëndësishem edhe për ministrinë dhe qeverinë. Qëllimi i Ministrisë së Arsimit është që të aplikojmë mekanzimat për sigurimin e cilësisë në të gjitha nivelet e arsimit, këtë e realizuam me ndihmën e projektit ALLED2 e cila na ofroi zgjidhje për sigurimin e cilësisë për shkollat profesionale”, theksoi Nagavci.
Për rëndësinë e këtij projekti ka folur edhe Ambasadori i Austrisë në Kosovë, z. Christoph Weidinger:
“Projekti ALLED2 ka mbështetur shkollat profesionale për të mirëmbajtur mekanizmat e sigurimit të cilësisë dhe duke mbështetur më tutje zhvillimin e kapaciteteve të koordinatorëve si dhe sigurimi i cilësisë për drejtorë e shkollave profesionale.
Koordinatorët e cilësisë kanë pasur mundësinë që të mbajnë nivelin e kolegëve dhe të ndihmojnë njëri tjetrin. Arsyeja e këtij projekti është që të ndihmojmë shkollat profesionale në Kosovë që të jenë më cilësore dhe më konkurruese”.
Ndërsa përfaqësuesi nga Zyra e BE-së në Kosovë, Johannes Madsen theksoi se ky është një intervenim i domosdoshëm në Kosovë, po ashtu sipas tij sigurimi i cilësisë në shkolla profesionale është e domosdoshme për përgatitjen për treg të punës.
Projekti ALLED2 është i financuar nga Bashkimi Evropian dhe bashkëfinancuar nga Agjencia Austriake për Zhvillim ku ka trajnuar drejtorët e shkollave dhe koordinatorët për cilësi, me qëllimin e vetëm të harmonizimit dhe aftësimit me nevojat e tregut. /Kosovatimes/
