Sivjet, për herë të parë, Kosova përmes Kolegjit të Kirurgëve të Kosovës, po merr pjesë si e barabartë me shtetet tjera në Kongresin e Kolegjit Amerikan të Kirurgëve, dhe po përfaqësohet nga Kryetari i saj, Prof. Dr. Rifat Latifi.
Gjatë ceremonisë së hapjes, që po mbahet në këto momente në San Diego, Kaliforni, e cila është ngjarje impozante me porosinë qendrore “Të shërojmë të gjithë, me aftësi dhe besim” po bëhet edhe pranimi i 2355 anëtarëve të ri në ACS.
Jemi tejet të nderuar që Kolegji i Kirurgëve të Kosovës është pjesë e kësaj ngjarjeje madhështore, duke qenë se Kongresi i rregullt vjetor i ACS-së është ngjarja më e rëndësishme e organizatës lidere në botë në fushën e kirurgjisë. Kolegji Amerikan i Kirurgëve është themeluar në vitin 1913, gjersa ka udhëhequr rrugën dhe ka vendosur standardet për kujdesin cilësor të pacientëve në spitalet dhe praktikat kirurgjikale në mbarë botën.
Motoja e Kongresit të sivjetmë është “Kirurgët Mbjellin Shpresën”, dhe me këtë rast Kongresi Klinik po ofron mundësi të jashtëzakonshme arsimore për çdo fazë të karrierës së kirurgëve – të gjitha në një vend:
– Ligjërata nga ekspertë të shquar botërorë,
– Prezantime të procedurave dhe kërkimeve novatore, dhe
– Rrjetëzim mes kolegëve nga e gjithë bota, ku fitohen njohuri dhe aftësi klinike dhe jo-klinike që mund të zbatohen menjëherë në praktikë. /Kosovatimes/
