Dy aleatë të presidentit rus Vladimir Putin u vranë disa orë larg njëri-tjetrit të mërkurën në mes të luftës midis Rusisë dhe Ukrainës.
Njëri prej tyre është Illia Kyva, një politikan 46-vjeçar pro-rus, trupi i të cilit u gjet në një periferi pranë Moskës. Sipas një raporti të AFP, një zyrtar ukrainas i mbrojtjes tha se Shërbimi i Sigurisë së Ukrainës (SBU) orkestroi atentatin. Komiteti Hetues i Rusisë i tha gazetës se “një person i panjohur qëlloi” ish-deputetin dhe se një hetim për vdekjen e tij kishte nisur.
Kyva u përjashtua nga parlamenti ukrainas disa javë pasi Rusia nisi pushtimin e saj në Ukrainë në shkurt 2022, dhe më pas u zhvendos në Rusi. Në nëntor, një gjykatë ukrainase e dënoi Kyva, në mungesë, me 14 vjet burg me akuzën e tradhtisë dhe përpjekjes për të rrëzuar me dhunë qeverinë, raporton Newsweek .Zëdhënësi i shërbimit të inteligjencës ushtarake ukrainase, Andriy Yusov, tha të mërkurën se “Kyva ka mbaruar” dhe se i njëjti fat do të kenë edhe tradhtarët e tjerë të Ukrainës, si dhe pasuesit e regjimit të Putinit.
Mediat ruse raportuan gjithashtu se Oleg Popov, një ish-deputet i parlamentit të Republikës Popullore të Luhanskut (LPR), të pushtuar nga Rusia, u vra në një shpërthim makine të mërkurën. LPR u krijua pasi Putini aneksoi ilegalisht katër rajone të Ukrainës në vjeshtën e vitit 2022.
Agjencitë e zbatimit të ligjit i thanë medias shtetërore ruse TASS se Popov u vra pranë stadiumit Avangard në qytetin e Luhansk. Ukraina nuk ka marrë përgjegjësinë për vdekjen e tij, siç ka bërë në disa raste më parë.
Kujtojmë se muajin e kaluar, përfaqësuesi i LPR-së, Mikhail Filiponenko, u vra në një sulm me makinë bombë në qytetin e Luhansk. Një zëdhënës i shërbimit të inteligjencës ushtarake të Kievit i tha më vonë Politico me telefon se atentati ishte orkestruar nga Ukraina.
“Po, ishte operacioni ynë,” tha Andriy Cherniak, një përfaqësues i agjencisë së inteligjencës ushtarake të Ukrainës.
