Për herë të parë në Kosovë, do të nis Festivali i muzikës dhe artit, dedikuar fëmijëve me nevoja të veçanta.
Profesoresha e artit muzikor në Qendrën Burimore “Përparimi” në Prishtinë, Blerina Kallaba – Pacolli, si iniciatore e kësaj ideje ka ndarë detaje të organizimit.
“Kam kënaqësinë të ju njoftoj për festivalin e muzikës dhe artit që u dedikohet nxënësve me nevoja të veçanta. Ky festival i kësaj natyre organizohet për herë të parë në vendin tonë dhe ka për qëllim përfshirjen e fëmijëve me nevoja të veçanta në aktivitetet kulturore, synon bashkëpunimin e nxënësve të shkollave të rregullta dhe qendrave burimore e organizatave të ndryshme dhe gjithashtu ndikon në zbulimin e talentëve të rinj të fëmijëve me nevoja të veçanta”, ka shkruar ajo.
Festivali do të ndahet në ekspozitë dhe koncert, teksa do të mbahet më 19 dhjetor në Sallën e Kuqe të Pallatit të Rinisë. /Kosovatimes/
