Kreu i LDK-së, Lumir Abdixhiku, ka bërë të ditur se të enjten në Selinë Qendrore të kësaj partie ka pritur Colleen E. Hyland, drejtoreshë për Evropë Jug Qendrore në Departamentin Amerikan të Shtetit, të cilës i ka shprehur mirënjohjen e partisë dhe anëtarësisë, për angazhimin amerikan në proceset e tanishme të Republikës.
“Në takim i kërkova që kjo mbështetje për Kosovën – për popullin tonë – të vazhdojë, veçmas në procesin e ndjeshëm dialogues me Serbinë, me qëllim të mbrojtjes së interesave tona shtetare, të përcaktuara në Kushtetutë e Deklaratë të Pavarësisë”, ka bërë të ditur Abdixhiku.
Ai tha se drejtoreshës Hyland i ka shprehur dhe pikëpamjet e LDK-së rreth dokumentit të draft-statutit – të pranuar tashmë ndërkombëtarisht nga kjo Qeveri – dhe brengat që kanë mbi përmbajtjen e tij.
“Kosova ka nevojë për aleatë që njohin historikun tonë; siç dhe duan të ardhmen tonë funksionale, si shtet e si shoqëri. SHBA-të janë të paalternativë në këtë drejtim”, ka thënë Abdixhiku.
