Me investimin e Korporatës së Sfidave të Mijëvjeçarit (MCC) ka përfunduar renovimi i soliterëve në lagjen “Ulpiana” në Prishtinë. Në ceremoninë e këtij investimi që ka synim efiçiencën e energjisë, mori pjesë kryeshefja ekzekutive e MCC-së, Alice Albright, e cila ka premtuar edhe investime të tjera në Kosovë.
Në ceremoninë e këtij investimi ka marrë pjesë edhe ambasadori amerikan, Jeffrey Hovenier, kryetari i Prishtinës, Përparim Rama, drejtori i përgjithshëm i Milenium Foundation Kosovo (MFK), Petrit Selimi, Sarah Olmstead nga MFK dhe ish-kryetari Shpend Ahmeti.
MCC ka ndarë 11 milionë euro për kursimin e energjisë, ku 1 mijë shtëpi janë izoluar tërësisht dhe mbi 20 banesa shumëkatëshe në shtatë qytete të Kosovës.
“Prej vitit 2004 ka investuar 15 miliardë dollarë për të parandaluar varfërinë në shumë shtete të botës. Me to në besojmë se iu kemi ndihmuar rreth 250 milionë njerëzve”, tha Alice Albright, vajza e ish-sekretares amerikane Medeleine Albright.
Ndërsa me Kosovën, Albright tha se MCC me Kosovën ka filluar bashkëpunimi në vitin 2017 duke investuar 49 milionë euro.
”Qasja e besueshme në energji është qasje thelbësore e modernizimit të jetës si dhe një element për të zbutur varfërinë dhe rritjen ekonomike për të përmirësuar standardin e jetës. Për fat të keq kërkesa për energji elektrike po e tejkalon ofertën”, tha Albright.
Ambasadori amerikan Jeffrey Hovenier, tha se ky investim është i rëndësishëm për Kosovën duke pasur parasysh krizën energjetike. “Qeveria amerikane është duke investuar në Kosovë për të zvogëluar varësinë nga thëngjilli. Prandaj Investimet në energji efiçinte është mënyra më e mirë për t’i tejkaluar këto sfida dhe te ecur përpara”, tha Hovenier.
Ndërsa, ministrja Rizvanolli tha se ShBA-ja ka vazhduar të jetë partner kyç në sektorin e energjisë duke ndihmuar Kosovën edhe në tranzicionin energjetik në burimet e ripërtërishme. “Këto investime janë tejet të rëndësishme nga investimet që do të vijnë nga Qeveria e Kosovës”, u shpreh ministrja Rizvanolli.
Ndërsa kreu i Prishtinës, Përparim Rama u shpreh i kënaqur me ndihmën që ka dhënë MCC, sepse në këto ndërtesa, siç tha ai, ikonike do të jetë banim më i mirë, më i ngrohte njëkohësisht edhe duke kursyer energjinë elektrike.
Ndërsa Petrit Selimi, kryeshef Ekzekutiv i Fondacionit të Mileniumit të Kosovës, tha se ky investim në lagjen “Ulpiana”, është shembulli më i mirë për të parë se si rritet vlera e banimit në këto banesa. “Pas një muaji këto banesa do ta kenë vlerën më të madhe, do të jene më të ngrohta, dhe do të shpenzojnë më pak rrymë”, tha ai.
