Tre të dyshuarve për vrasjen e Liridona Ademajt, Naim Murseli, Kushtrim Kokalla dhe Granit Plava, iu është vazhduar paraburgimi edhe për dy muaj.
Gjykata Themelore në Prishtinë, ka njoftuar se pas kërkesës së Prokurorisë Themelore në Prishtinë për vazhdimin e masës së paraburgimit në çështjen penale kundër të pandehurve N.M, G.P, dhe K.K, Departamenti për Krime të Rënda, i kësaj gjykate, ka aprovuar kërkesën e Prokurorisë për vazhdimin e paraburgimit për tre të pandehurit.
“Referuar kërkesës tuaj për informata, ju njoftojmë se pas kërkesës së Prokurorisë Themelore në Prishtinë për vazhdimin e masës së paraburgimit në çështjen penale kundër të pandehurve N.M, G.P, dhe K.K, Gjykata Themelore në Prishtinë – Departamenti për Krime të Rënda ka aprovuar kërkesën e Prokurorisë, ashtu që tre të pandehurve iu vazhdohet masa e paraburgimit në kohëzgjatje prej dy muaj, për secilin. Masa e paraburgimit të pandehurve iu është vazhduar nga data 31.12.2023 deri më datë 29.02.2024”, thuhet në njoftim e Zyrës për Informim dhe Komunikim me Media.
Si dihet për vrasjen e 30 vjeçes, Liridona Ademaj janë arrestuar 4 persona të dyshuar, në mesin e tyre edhe bashkëshorti i saj, Naim Murseli. /Kosovatimes/
