Qëndresë Cuci, studente e studimeve master ne programin E-qeverisje në Universitetin Publik “Kadri Zeka” në Gjilan, është shpërblyer me vendin e parë në konkursin e Bankës Qendrore të Kosovës (BQK), “Ekonomisti i Ri”. Çmimi ka për qëllim nxitjen e aktivitetit hulumtues e shkencore në fushën e ekonomisë.
Çmimi “Ekonomisti i Ri” është një iniciativë për të promovuar dhe nxitur hulumtimin në ekonomi, duke vlerësuar kontributet më të dalluara në këtë fushë. Qëndresa Cuci, siç thuhet në njoftimin e lëshuar nga UP “Kadri Zeka”, ka shkëlqyer me punën e saj të thelluar mbi temat e avancuara ekonomike, duke lënë një ndikim të madh në komunitetin akademik.
Rektori i UP “Kadri Zeka”, Artan Dërmaku, ka uruar studenten Cuci për këtë sukses si dhe inkurajoi të gjithë studentët të ndjekin shembullin e saj dhe të angazhohen në zhvillimin e tyre personal dhe profesional.
Sipas UP “Kadri Zeka”, Qendresa Cuci është paraqitur në konkursin e BQK-së me temën: Ndikimi i teknologjisë dhe digjitalizimit në transformimin e ekonomisë, me theks në ndikimin e sistemit të pagesave në Kosovë.
