Gjykata e Posaçme Kundër Krimit dhe Korrupsionit pritet të vendosë mesditën e sotme mbi masën e arrestit për ish-kryeministrin Sali Berisha.
Seanca e cila do të mbahet në orën 12:00 vjen pas zhvillimit të tre të tillave ku u dëgjuan të gjitha palët dhe Struktura e Posaçme Kundër Krimit dhe Korrupsionit (SPAK) kërkoi masën e arrestit shtëpiak.
Nga ana tjetër avokatët e Berishës gjatë dy ditëve të fundit kanë dhënë prova të tjera dhe kanë kërkuar një CD për të marrë të gjithë debatin gjyqësor. Sipas tyre, kjo kërkesë nuk duhet të kundërshtohet pasi Berisha nuk ka pasur asnjë tentativë për t’u larguar nga vendi.
Gjithashtu avokatët e Berishës kërkuan edhe përjashtimin e gjyqtares Irena Gjoka gjë e cila hodhi poshtë kërkesën e tyre duke shtyrë edhe seancën për ditën e sotme.
“Në vijim të interesit të shfaqur nga gazetarët Ju bëjmë me dije se deri në orën 16.00, në sekretarin e gjykatës nuk është paraqitur kërkesë me shkrim e avokatëve të shtetasit Sali Berisha për përjashtimin e gjyqtares Irena Gjoka! Duke Ju falënderuar për bashkëpunimin”, thuhet në njoftimin e bërë më parë nga Gjykata e Posaçme Kundër Krimit dhe Korrupsionit, transmeton RTSh.
Struktura e Posaçme Kundër Krimit dhe Korrupsionit kërkon masën “arrest në shtëpi” ndaj ish-kryeministrit Berisha në adresën e deklaruar, me mbikëqyrje policore, ku pjesë e kësaj mase është edhe ndalimi i komunikimi me të tjerët i liderit historik të së djathtës.
Kjo kërkesë e SPAK vjen pasi Kuvendi dha autorizimin për heqjen e imunitetin të deputetit të ish-kryeministrit Berisha teksa më parë Struktura e Posaçme kishte kërkuar detyrim paraqitje gjë e cila nuk u zbatua nga Berisha duke bërë që të shkohet në një masë më të fortë.
Ish-kryeministri Sali Berisha akuzohet për korrupsion pasiv në rastin e privatizimit të ish-kompleksit sportiv Partizani dhe se përmes këtij privatizimi ai ka favorizuar dhëndrin e tij Jamarbër Malltezi (i cili ndodhet në arrest shtëpie) përgjatë viteve 2005-2013, kur ushtronte detyrën si kryeministër i vendit.
