Numri i të vdekurve nga tërmeti që goditi Japoninë më 1 janar është rritur në 64. Tërmeti ishte më vdekjeprurësi që ka goditur Japoninë që nga viti 2016, raporton Reuters .
Të mërkurën priten reshje të dendura shiu në zonat e goditura nga tërmeti, të cilat mund të çojnë në rrëshqitje të dheut dhe të pengojnë më tej përpjekjet e kërkim-shpëtimit. Ndihma për zonat e prekura pengohet gjithashtu nga shkatërrimi i rrugëve dhe infrastrukturës. Shkalla e dëmeve dhe numri i përgjithshëm i viktimave të tërmetit mbeten ende të paqarta, vëren Reuters.
Një tërmet me magnitudë 7.6 goditi Gadishullin Noto të hënën pasdite. Më shumë se 33,000 njerëz janë larguar nga shtëpitë e tyre dhe disa zona nuk kanë akses në ujë dhe energji elektrike, sipas autoriteteve prefekturale Ishikawa.
Të martën, kryebashkiaku i qytetit Suzu, që ndodhet afër epiqendrës së tërmetit, tha se 90 për qind e shtëpive të qytetit mund të shkatërrohen.
Në total, rreth 200 lëkundje kanë ndodhur në Japoni që nga 1 janari.
- Një avion i rojes bregdetare që po udhëtonte për në zonat e goditura nga tërmeti u përplas me një aeroplan pasagjerësh të Japan Airlines në aeroportin e Tokios të martën. Si pasojë, pesë pjesëtarë të rojes bregdetare u vranë. Të gjithë 379 personat në bordin e fluturimit të Japan Airlines u shpëtuan.
