Njësiti Antikontrabandë i Doganës së Kosovës, ka realizuar të premten një aksion në regjionin e Vitisë, duke parandaluar kontrabandë në vlerë mbi 20 mijë euro. Sipas njoftimit për medie, aksioni është zhvilluar në kuadër të planin operativ në vijën e gjelbër, ndërmjet Kosovës dhe Maqedonisë së Veriut.
“Ky operacion ka targetuar automjete transportues të dyshimtë për kontrabandë me mallra. Pas ndalimit të automjetit të parë u gjeten mallra të kontrabanduara, tekstile – veshmbathje, në një sasi prej 2080 artikujve. Vlera e këtyre mallrave përcaktohet rreth 9,000 euro”, thuhet në njoftimin e Doganës.
Përveç kësaj, sipas të njëjtit njoftim, është vërejtur se këto mallra shkelin të drejtën e pronësisë intelektuale dhe janë marka të falsifikuara.
“Derisa në rastin e dytë, përsëri janë hasur në tentim të kontrabandimit tekstil në vlerë rreth 12,000 euro. Mallrat e kontrabanduara janë sekuestruar dhe ndaj palëve janë nisur procedurat kundërvajtëse”, thuhet në njoftimin e Doganës.
Kjo e fundit thuhet se po vazhdon të angazhohet për të forcuar masat e sigurisë dhe luftën kundër kontrabandës nëpërmjet bashkëpunimit me autoritetet e tjera vendore dhe rajonale. /Kosovatimes/
