Policia e Kosovës nga rajoni i Prizrenit, ka arrestuar të enjten tre zyrtarë të një klike mjekësore, nën dyshimin se janë përfshirë në dhënien e certifikatave mjekësore pa qenë personat prezent në klinikë. Kjo e fundit bashkëpunonte me dy autoshkolla, për t’i pajisur kandidatët me dokumente për hyrjen në provimin e patentë-shoferit.
“Sot më 18.01.2024, nën dyshimin e përfshirjes në veprat penale: ‘keqpërdorim i pozitës apo autoritetit zyrtar’ dhe ‘legalizim i përmbajtjes se rreme, policia ka arrestuar tre të dyshuar: I.G., (viti i lindjes 1962, mashkull kosovar), U.M., (viti i lindjes 1975, mashkull kosovar) dhe L.B.., (viti i lindjes 1975, mashkull kosovar). Personat e dyshuar janë intervistuar dhe me vendim të prokurorit janë dërguar në mbajtje deri 48 orë”, thuhet në njoftimin e Policisë së Kosovës.
Sipas njoftimit, hetuesit policorë nga Sektori për Hetime Financiare dhe Ekonomike në Prizren kanë trajtuar informatën se, zyrtarët e një klinike mjekësore me seli në Prizren, po lëshojnë certifikata mjekësore për kandidatet të cilët paraqesin provimin për patentë-shofer, pa qenë fizikisht prezent në klinikë dhe pa ua bërë kontrollin mjekësor.
Po ashtu, dyshohet se kjo klinikë bashkëpunon me dy auto-shkolla, njëra me seli në Prizren dhe tjetra me seli në Malishevë.
“Dyshohet se edhe auto-shkollat kanë lëshuar vërtetime për aftësimin e kandidatëve në pjesën teorike dhe praktike pa qenë kandidatët fare prezent në Kosovë. Kjo informate është trajtuar nga hetuesit policorë në bashkëpunim me Prokurorin Themelore Prizren, ku pas ndërmarrjes se veprimeve hetimore janë mbledhur provat fillestare që vërtetojnë dyshimin e bazuar në lidhje me pretendimet (dyshimet) e lart-cekura”, thuhet në njoftimin e policisë. /Kosovatimes/
