Rënia e çatisë së objektit të ri të Komunës së Prishtinës, në lagjen “Arbëria”, të enjten ka lënduar një 23-vjeçare. Për këtë rast pat reagime të shumta. Edhe kryetari i Prishtinës, Përparim Rama, ka kërkuar nga organet kompetente që të hetojnë rastin në tërësi dhe të marrin të gjitha masat dhe veprimet në pajtim me legjislacionin në fuqi, kurse prokuroria ka filluar hetimet për këtë rast.
Arkitekti Uran Kyqyku tha se lidhur me rënien e çatisë së objektit të ri të Komunës së Prishtinës, paraprakisht duhet të bëhet një inspektim, raport nga një institucion i pavarur.
Kyqyku, në emisionin “Info Plus”, tha se dihet se dje erërat nuk ishin edhe aq të forta, as në Prishtinë e as në Kosovë, për ta shkulur çatinë e objektit të ri Komunës. Sipas tij, fajtor mund të jetë ndërtimi me material jo kualitativ dhe forma e dobët e punimeve.
“Cilësia e ndërtimeve në Kosovë është e dobët, bëhen pa arkitektë të licencuar, gjë që nuk do të duhej të ndërtohet. Vendosen kulme të pjerrëta në projektime të kulmeve të rrafshëta”, tha Kyqyku.
Ai thotë se projektimet duhet të bëhen nga arkitektë të licencuar dhe me përvojë, kurse kualiteti i projekteve duhet tu përmbahet standardeve.
“Duhet të bëhet hetim profesional, duhet të shikohet projektuesi, kryerësi i punimeve dhe organi mbikëqyrës. Problem tjetër te ne janë ndërhyrjet e paautorizuara në ndërtimtari”, shton Kyqyku.
Sipas tij, te ne nuk ushtrohet një kontrolli i rrebet mbi punë kryerësin dhe organin mbikëqyrës, njëherësh kërkon që të merren masa më të rrepta, nëse punimet nuk kryhen si duhet.
