Përfaqësuesit special të Bashkimit Evropian dhe Amerikës për dialogun ndërmjet Beogradit dhe Prishtinës, Miroslav Lajçak dhe Gabriel Eskobar, kanë thënë për Kuririn e sotëm të Beogradit se e ardhmja e Serbisë dhe Kosovës është në Bashkimin Evropian dhe se dialogu është mekanizëm për arritjen e një marrëveshjeje gjithëpërfshirëse, shkruan Kosovatimes.
Lajçak vuri në dukje se rruga drejt BE-së e të dyja palëve çon përmes dialogut dhe se “një marrëveshje gjithëpërfshirëse për normalizimin është e nevojshme sepse ‘status quo’ nuk është e qëndrueshme”.
“Është shumë e rëndësishme që ne të kapërcejmë fazën aktuale në të cilën flasim pothuajse çdo ditë me dy liderët vetëm për të shmangur tensionet më të mëdha dhe të fillojmë të flasim më shumë për tablonë më të gjerë”, tha Lajçak.
Ai theksoi se pa normalizim nuk do të ketë anëtarësim në BE, se duhet një marrëveshje sa më shpejt të jetë e mundur dhe se i takon të dyja palëve të bien dakord se çfarë përbën një kompromis për to.
Escobar tha për Kurir se beson se dialogu do të përfundojë me normalizimin e marrëdhënieve.
“Mendoj se duhet të largohemi nga narrativa se Kosova është Serbi dhe të shkojmë drejt narrativës se Kosova dhe Serbia janë Evropë. Dhe kështu, ju keni një të ardhme të përbashkët që po largohet me shpejtësi nga problemet e viteve nëntëdhjetë dhe po shkon shpejt drejt mundësive të shekullit të 21-të”, tha Escobar.
Ai beson se Ballkani Perëndimor është i aftë të jetë shtytës i zhvillimit ekonomik dhe se në të duhet të fokusohet. /Kosovatimes/
