Grupi i fëmijëve “Respect Our Rights” – ROR dhe Asambletë Komunale të Fëmijëve të Kosovës sot realizuan fushatën për parandalimin e përdhunimeve seksuale me moton “Teshat nuk m’definojnë”.
Kjo fushatë kishte për qëllim rritjen e përgjegjësisë së institucioneve dhe vetëdijes së qytetarëve lidhur me këto dukuri dhe thellimin e bashkëpunimit në mes të ROR-it, institucioneve shtetërore dhe vendimmarrësve. “Të gjithë jemi të jashtëzakonisht të shqetësuar me rastet e fundit të ngacmimeve dhe abuzimit seksual ndaj të miturve/fëmijëve.
Duke parë që institucionet e drejtësisë nuk janë duke dhënë dënimet e merituara e më kohë për abuzuesit, na ka shtyrë që sot, në këtë mot me shi, përmes këtij instalacioni të synojmë të rrisim përgjegjësinë institucionale dhe vetëdijen e shoqërisë që këto dukuri të parandalohen me kohë”, ka thënë Drion Shaqiri nga Grupi ROR.
“Këto kukulla qe jeni duke i parë, simbolizojnë fëmijët e Kosovës pa dallime racore, etnike e fetare dhe gjuhës që flasin dhe se identiteti, dukja dhe rrobat e tyre kurrë nuk janë shkas,” ka shtuar ai. Në anën tjetër, Shefi i Zyrës së BE-së/Përfaqësuesi Special në Kosovë, Tomáš Szunyog, ka thënë se të gjithë duhet të angazhohen që fëmijët të jenë të mbrojtur kudo dhe të krijohen mjedise të sigurta për ta.
Ai më tej i bëri thirrje qeverisë, shoqërisë civile dhe gjithë atyre që punojnë me fëmijë të ofrojnë mbështetje. “Bëjmë thirrje që më shumë të angazhohemi t’i kuptojmë nevojat e fëmijëve, t’i mbështesim ata duke krijuar legjislacion, ndërtuar shkolla, parqe dhe mjedise të nevojshme e të sigurta për ta kudo, me ç’rast edhe ne si Zyre jemi të angazhuar përmes mbështetjes tonë për qeverinë dhe organizatat e shoqërisë civile,” tha Ambasadori i BE-së në Kosovë, Szunyog.
Përpos Ambasadorit Szunyog, në fushatë ishin të pranishëm ishte edhe diplomatja e Ambasadës së Suedisë në Kosovë Katja Holböll, Policia e Kosovës, Drejtori i Organizatës Save the Children Ahmet Kryeziu dhe përfaqësues të fushës së mbrojtjes së fëmijës nga Organizata Syri i Vizionit. Ani pse institucionet me të larta shtetërore, si Ministria e Arsimit dhe ajo e Drejtësisë, u ftuan në këtë fushatë dhe konfirmuan praninë e tyre, ato sot nuk u panë në këtë ngjarje.
Fushata u realizua në kuadër të programit në fushën e mbrojtjes së fëmijëve dhe qeverisjes me të drejtat e tyre “Detyrimi ynë për të Ardhmen – Mbrojtja e Fëmijëve dhe Qeverisja e të Drejtave të Fëmijës” i cili zbatohet nga organizata Syri i Vizionit në partneritet me Save the Children, zyra në Kosovë, dhe financohet nga Agjencia Suedeze për Zhvillim Ndërkombëtar.
Ky aktivitet është financuar nga Qeveria e Suedisë. Përgjegjësia për përmbajtjen i takon tërësisht krijuesit.
Sida nuk ndan domosdoshmërisht pikëpamjet dhe interpretimet e shprehura. /Kosovatimes/
