ShBA beson se asnjë vend nuk duhet të zgjerojë bashkëpunimin me Rusinë ndërkohë që ajo vazhdon luftën e saj të agresionit kundër Ukrainës, njoftoi Departamenti Amerikan i Shtetit në lidhje me vendimin e Ministrisë së Punëve të Jashtme të Serbisë për të nënshkruar një plan konsultimi për dy vitet e ardhshme me Rusinë, shkruan Kosovatimes.
Një zëdhënës i Departamentit të Shtetit i tha Zërit të Amerikës të mërkurën se “lajmi për marrëveshjen është befasues dhe në kontrast të plotë me takimet e tjera konstruktive të mbajtura me zyrtarët serbë në Nju Jork”.
Në Nju Jork, presidenti serb Aleksandar Vuçiç foli mes të tjerëve me Këshilltarin e Sigurisë Kombëtare të Shtëpisë së Bardhë, Jake Sullivan dhe nënsekretaren për Çështjet Politike, Victoria Nuland.
“Rafrimi i mëtejshëm me Rusinë është një hap në drejtimin e gabuar dhe bie ndesh me aspiratat evropiane të shprehura të Serbisë… Serbia duhet të përshpejtojë hapat për të avancuar në rrugën evropiane, duke përfshirë diversifikimin e burimeve të energjisë për të reduktuar varësinë e energjisë nga Rusia dhe përafrimin e politikës së jashtme dhe të sigurisë me Bashkimin Evropian”, theksoi zëdhënësi.
Dokumenti u nënshkrua javën e kaluar, në margjinat e Asamblesë së Përgjithshme të Kombeve të Bashkuara, nga ministri i Punëve të Jashtme të Serbisë me mandat teknik Nikola Selakoviq dhe ministri i Jashtëm rus Sergej Lavrov.
Selakoviq tha se është një dokument teknik që është nënshkruar që nga viti 1996 dhe se përmban deklarata që kanë të bëjnë me Kosovën dhe politikën e jashtme dhe se në të nuk ka elemente të politikës së sigurisë. /Kosovatimes/
