Kosova dhe populli i vet janë të gëzuar që e njohin një Gjermani të bashkuar demokratike, me popullin e mirë dhe qeverinë e besuar në krah të vet. Kështu theksoi në një fjalim kreu I qeverisë së Kosovës Albin Kurti në pritjen e organizuar nga Ambasada gjermane, në shënim të Ditës së bashkimit të Gjermanisë. Ai tha se miqësia e Kosovës me Gjermanin është e veçantë, shkruan Kosovatimes.
“Nuk është e bazuar vetëm në interesa strategjike, politike apo ekonomike. Është shumë më shumë se kaq: Ne ndajmë konceptimin e njëjtë të të drejtave themelore të njeriut dhe të vlerave liberale dhe sociale”, tha Kurti.
Ai ndër të tjera ka përmendur lidhjet e forta në mes dy vendeve që në masë të madhe bartet nga mërgimtarët tanë që banojnë në Gjermani, të cilët janë po ashtu të angazhuar thellësisht në Kosovë, me zemrat dhe mendjet dhe kursimet e veta.
“Nëse e kam zili Gjermaninë për diçka (përveç që na kanë sjellë dijetarët dhe kompozitorët më të famshëm), është se ajo është vendbanimi i gjithë këtyre njerëzve punëtorë. Na keni borxh të madh”! Mirëpo, Gjermania ka dhënë shumë në dekadat e fundit, për të cilat Qeveria e Kosovës shprehu mirënjohje: “Jemi mirënjohës që na mirëpritët dhe që iu dhatë strehë refugjatëve të Kosovës gjatë dekadës së fundit të shekullit 20. Jemi mirënjohës që qëndruat të vendosur me NATO-n dhe me popullin tonë për të ndalur gjenocid. Jemi mirënjohës për më shumë se 1 miliard EUR në ndihmë zhvillimore dhe jemi mirënjohës për mbështetje të vazhdueshme politike në rrafshin ndërkombëtar”, tha Kurti duke u falënderuar në gjuhën gjermane Vielen Dank und Glückëunsch.
Ai në fund rikujtoi se pikërisht ata që nuk dëshironin që të binte muri në Berlin, tashmë po bëjnë një luftë kriminale kundër Ukrainës.
“Ata humbën atëherë dhe, tri dekada më vonë, do të humbasin përsëri”, tha ai.
Ndryshe Kurti në fjalimin e tij përgëzoi popullin gjerman për Ditën e bashkimit të Gjermanisë. 3 tetor 1989 ishte një përfundim dhe një fillim.
“Ishte përfundimi i 45 vjetëve të ndarjes. Pra, këtë ditë e festojmë, jo vetëm se i bashkoi ato që duhej të ishin bashkë, por edhe se e shënoi përfundimin e rrezikut real për Evropën dhe paqen e saj. Nga ana tjetër, ishte një fillim, jo vetëm se dy Gjermanitë e bashkuara do të nisnin të ardhmen e tyre të përbashkët, por edhe se mundëm ta ndienim që perdja e hekurt po copëtohej, duke ia hapur rrugën lirisë dhe demokracisë”, tha Kurti.
Ai tha se kjo ditë duhet të kujtohet dhe festohet me gëzim. Gjermania kaloi një kryengritje paqësore.
“Qytetarët e Republikës Demokratike Gjermane nuk do t’u frikësoheshin më të shtënave vdekjeprurëse te kufiri apo që po spiunoheshin nga shteti i vet. Kjo kryengritje paqësore ka ardhur jo vetëm se ishte vullnet i popullit, por edhe se NATO dhe komuniteti evropian qëndronin të vendosur, se udhëheqës të mençur dhe largpamës, nga Gorbachev te Reagan, nga Miterrand te Kohl, mundën të lexonin shenjat e kohës së vet”, tha Kurti. /Kosovatimes/
