Presidenti i SNSD, Milorad Dodik , i cili është gjithashtu kandidat i partisë për president të entitetit serb në zgjedhjet e ardhshme të përgjithshme në Bosnje dhe Hercegovinë, është prapa rivales së tij kryesore, Jelena Triviq , e cila është kandidatja e opozitës, sipas sondazheve të mëparshme.
Nga frika e humbjes në zgjedhjet e 2 tetorit, Milorad Dodik, kurseu një shumë të madhe parash, rreth 30 milionë euro, dhe ia transferoi Serbisë. Ato para duhet të shërbejnë si një kthim i sigurt në rast se gjërat shkojnë keq pas natës së zgjedhjeve, shkruan portali serb “24sedam.rs” , i afërt me regjimin e Aleksandër Vuçiqit.
Dodik këtë operacion “biznes” e ka realizuar me ndihmën e partnerëve të tij të vjetër të biznesit, Miroslav Mishkoviq (Delta) dhe Dragan Gjurić (Zekstra), duke blerë hotelin luksoz “Holiday Inn” në Beograd për 30 milionë euro.
Përkatësisht, kompania “Delta Real Estate” është pronare e hotelit “Holiday Inn” që nga nëntori i vitit 2016, por pak ditë më parë Mishkoviq është takuar me Dodikun dhe ia “shiti” hotelin.
Për ta bërë këtë transaksion sa më të ligjshëm, Dodik futi një sasi të madhe parash në rrjedhat e parasë përmes Dragan Gjuriqit dhe kompanisë së tij “Zekstra”, e cila formalisht u shfaq si blerëse e “Holiday Inn”.
Kështu Dodik ka “parkuar” aksione parash në Beograd, të cilat nëse është e nevojshme do të mund t’i aktivizojë me një transaksion të ri, shkruan portali i regjimit 24sedam.rs”.
Meqë ra fjala, Dodik, Mishković dhe Gjurić kishin tashmë sipërmarrje të ngjashme biznesi të përbashkëta, kur morën nën kontroll dyqanin “Boska” të vendosur në qendër të Banja Lukës. Në vitin 2009, konsorciumi “Delta-Zekstra” bleu rreth 58 për qind të aksioneve të “Boska” për tre milionë euro.
Gjithashtu, në mars 2019, Dodik dhe Mišković hapën bashkërisht Delta Planet në Banja Luka, atëherë qendra më e madhe tregtare në Bosnje dhe Hercegovinë, e cila është në pronësi formale të “Delta Real Estate” të Miroslav Miškoviq. /Kosovatimes/
