Komisari ushtarak i rajonit Khabarovsk të Rusisë është shkarkuar nga posti i tij, pasi gjysma e të sapomobilizuarve janë dërguar në shtëpi, për shkak se nuk i kanë plotësuar kushtet e nevojshme, tha sot guvernatori i këtij rajoni, Mikhail Degtyarev.
“Oficeri ushtarak rajonal Yuri Sergeevich Laiko u hoq nga posti i tij sot. Kjo në asnjë mënyrë nuk do të ndikojë në realizimin e synimeve të vendosura para nesh nga Presidenti Vladimir Putin. Ne po punojmë së bashku me Ministrinë e Mbrojtjes, industrinë tonë, organizatat dhe të gjitha agjencitë përkatëse”, tha Degtyarjev në një video në Telegram.
Sipas guvernatorit, disa mijëra banorë të rajonit të Khabarovsk u ftuan si pjesë e mobilizimit të pjesshëm ushtarak, por gjysma u kthyen në shtëpi, sepse nuk plotësonin kushtet e nevojshme.
Në Rusi, më 21 shtator u shpall një mobilizim i pjesshëm dhe u njoftua se do të mobilizoheshin 300 mijë njerëz.
Ministria e Mbrojtjes së Rusisë njoftoi dje se qytetarët e Rusisë, të cilët janë mobilizuar në kuadër të mobilizimit të pjesshëm, po i nënshtrohen stërvitjes luftarake në qendrat stërvitore të Ministrisë së Mbrojtjes dhe në terrenet e stërvitjes së pasme. /Kosovatimes/
