Kryeministrja serbe Ana Brnabiq tha sot se njoftimi i Bashkimit Evropian se Serbia nuk është përjashtuar nga pakoja e tetë e sanksioneve kundër Rusisë për shkak të agresionit të saj ndaj Ukrainës, gjegjësisht se nuk është përjashtuar nga vendimi për ndalimin e importit të naftës ruse, “praktikisht do të thotë sanksione ndaj Serbisë”.
Brnabiq tha për televizionin Prva se “nëse kjo ndodh, sigurisht që do të ketë pasoja të rënda për ekonominë e Serbisë”, dhe se “është një lajm relativisht i mirë që vendimi përfundimtar është shtyrë për 1 dhjetor”.
“Do të ketë shumë biseda më të vështira. Vuçiq do të shpallë disa vendime strategjike nesër në konferencën për shtyp”, tha Brnabiq.
Ajo tha se vendimi për ndalimin e importit të naftës ruse, i cili u iniciua nga Kroacia, “është qartë një akt i hapur armiqësie ndaj Serbisë dhe se ata janë të gatshëm të përdorin çdo gjë kundër Serbisë, përfshirë krizën energjetike”.
“Ne do të duhet të pozicionohemi disi ndryshe”, tha Brnabiq.
Kur u pyet nëse Serbia mund të bëjë pa importuar naftë ruse, Brnabiq u përgjigj se “mund të bëjë pa naftën ruse plotësisht”, por se blerja nga burime të tjera të furnizimit do të ishte më e shtrenjtë. /Kosovatimes/