Presidenti i Serbisë , Aleksandar Vuçiq , sot ndodhet në Pragë për samitin e komunitetit politik evropian. Në profilin e tij në Instagram, ai është mburrur me një takim të shkurtër me kancelarin gjerman Olaf Scholz , i cili, siç thotë ai, i ka përsëritur se Gjermania “mund të presë gjithmonë pjesëmarrje serioze dhe partneritet” nga Serbia në të gjitha projektet që janë në interesin kombëtar serb.
Ai njoftoi gjithashtu se ka pasur një “takim të përzemërt, si gjithmonë, kudo ku takohen” me presidentin e Francës, Emmanuel Macron , dhe shtoi se ata “ranë dakord të takohen sërish”.
“Ramë dakord që të takohemi sërish, për të shqyrtuar çështjet më të rëndësishme për të ardhmen, jo vetëm të vendit tonë dhe rajonit, por edhe në dritën e krizës globale me të cilën po përballemi të gjithë”, ka shkruar Vuçiq.
Këto njoftime nuk janë asgjë e re. Vuçiqit i pëlqen të mburret rregullisht se mban marrëdhënie të përzemërta me liderët e vendeve më të fuqishme në botë, ndaj edhe këto takime të shkurtra zyrtare i shërbenin të njëjtave qëllime propagandistike.
Mirëpo, se si Vuçiq vërtet e kaloi kohën e tij në Pragë, një video e shfaqur në rrjetet sociale zbardhë shumë më mirë sesa vetëlavdërimet e tij në Instagram.
Gjegjësisht, në të shohim Erdoganin, Orbanin, Aliyevin, Macronin dhe krerët e tjerë të shtetit duke bërë një bisedë të përzemërt në sallën e Pallatit të Pragës, ndërsa Vuçiq qëndron i vetëm, i “përthithur” në telefon dhe herë pas here ngre kokën por askush nuk e vëren atë.
Kjo video shumë shpejt u bë virale dhe padyshim që tabloidët e regjimit do t’i kenë duart plot për të justifikuar “izolimin” e Vuçiqit në Pragë. /Kosovatimes/
