Presidentja Vjosa Osmani në Seminarin e 102-të Rose-Roth të Asamblesë Parlamentare të NATO-s, i cili po mbahet në Prishtinë tha se Kosova dhe vendet tjera janë të rrezikuara nga sfida të shumta , mbesin tw pwrkushtuara për partneritet dhe aleancë.
“Pjesëmarrësit në këtë seminar vijnë në vendin dhe në kohën e duhur për shkak se adresohen më shumë se sa perspektiva të ardhshme, por këto do të jenë veprimet e ardhshme që do të kërkojnë kohën për një integrim euroatlantik të prekshëm, të dukshëm dhe të i vërtetë”, tha ajo.
Për Kosovën integrimi euroatlantik ka qenë më shumë se sa thjesht një deklaratë e zbrazët, ajo gjithmonë ka qenë dhe do të jetë një interes vital, strategjik kombëtar, deklaroi Osmani.
Osmani poashtu tha se është jashtëzakonisht më rëndësi për secilin anëtarë të NATO-s që ta mbështesë anëtarësimin e Kosovës në partneritetin për paqe.
Osmani u shpreh se aktualisht po kërcënohet stabiliteti, demokracia dhe paqja në mbarë botën, ndërsa në vijimësi ka sulme të sofistikuara hibride.
“Bota siç e dimë të gjithë po ndodhet në një pikë kthese, ne po ballafaqohemi me realitetin e kërcënimeve botërore, ndaj paqes, stabilitetit dhe demokracisë. Gjithashtu po ballafaqohemi me sulmet e sofistikuara hibride, dezinformime dhe propaganda, kërcënime transnacionale dhe ndikimet e sigurisë që burojnë nga disa prej heshtjeve që nuk njohin kufi, ndryshimet klimatike dhe pandemia”, tha Osmani.
Presidentja ka thënë se vlerat demokratike dhe rregullat mbarë botërore jo vetëm që po kërcënohen por janë edhe duke u sulmuar.
Konjufca: Duam të bëhemi pjesë e NATO-s
Ndwrsa Kryetari i Kuvendit të Kosovës, Glauk Konjufca, ka thënë se Kosova është e vendosur për një bashkëpunim edhe më të ngushtë dhe për anëtarësim në NATO. Ai tha se Kosova ‘natyrshëm e fuqishëm është vendosur në krah të shteteve demokratike, duke vënë sanksione ndaj Federatës Ruse pas agresionit ushtarak në Ukrainë’.
Konjufca theksoi se populli shqiptar në Kosovë e dinë shumë mirë se nëpër çka po kalon populli ukrainas, ngase e kanë përjetuar në lëkurën e vet agresionin e Serbisë para më shumë se dy dekadash, teksa ka theksuar se mendësia e Putinit është e njëjtë me atë të kriminelit Millosheviq.
“Ne e kuptojmë nëpër çka po kalon populli i Ukrainës si askush tjetër meqë vetë ishim një popull që u sulmua në vendin e vetë nga Serbia e Millosheviqit në vitin 1998. Edhe Millosheviqi mendonte se Kosova nuk ishte djepi i popullit që jetonte këtu por thoshte se ishte zemra e Serbisë. Ai mendonte që Kosova dhe populli i saj nuk duhej të ekzistonin, njëjtë mendon edhe Putini për Ukrainën”, ka theksuar Konjufca.
Ai tutje ka theksuar se Kosova do të ndërmarrë të gjitha reformat e nevojshme në mënyrë që të anëtarësohet në NATO, teksa ka theksuar se synimi është që FSK të bëhet ushtri moderne. /Kosovatimes/
