Edhe pse Wagner ka vite që lidhet me Kremlinin, Rusia zyrtare gjithmonë ka mohuar çdo lidhje.
Shtetet e Bashkuara kanë akuzuar mercenarët rusë për shfrytëzimin e burimeve natyrore në Republikën e Afrikës Qendrore, Mali, Sudan dhe vende të tjera afrikane për të ndihmuar në financimin e luftës së Moskës në Ukrainë. Moska i hedh poshtë këto akuza, duke i cilësuar ato “zemërim anti-rus”.
Ambasadorja e ShBA-së në Kombet e Bashkuara Linda Thomas-Greenfield tha se grupi mercenar Wagner shfrytëzon burimet natyrore dhe se “këto përfitime të paligjshme përdoren për të financuar makinën luftarake të Moskës në Afrikë, Lindjen e Mesme dhe Ukrainë.”
“Mos bëni gabim. Njerëzit në të gjithë Afrikën po paguajnë një çmim të lartë për praktikat shfrytëzuese të Grupit Wagner dhe shkeljet e të drejtave të njeriut”, tha Thomas-Greenfield në takimin e Këshillit të Sigurimit të OKB-së mbi financimin e grupeve të armatosura përmes tregtisë së paligjshme të burimeve natyrore në Afrikë.
Nga ana tjetër, ambasadori rus në OKB, Vasily Nebenzya, tha se i vjen keq që Thomas-Greenfield ngriti çështjen e mbështetjes ruse për partnerët afrikanë.
“Ai ekspozon planet dhe qëllimet e tyre reale – çfarë kanë vërtet nevojë nga vendet afrikane”, tha Nebenzya, pa dhënë detaje.
Wagner – mercenarë afër Kremlinit
Një grup mercenarësh që luftonin për Rusinë me emrin Wagner u krijua në 2015.
Edhe pse Wagner ka vite që lidhet me Kremlinin, Rusia zyrtare gjithmonë ka mohuar çdo lidhje.
Vetëm në fund të shtatorit 2022 u konfirmua zyrtarisht se kush qëndron pas këtij grupi – një njeri i fuqishëm i afërt me Putinin, Yevgeny Prigozhin .
Në një njoftim të papritur, të lëshuar përmes kompanisë së tij të mikpritjes Concord, Prigozhin pranoi se ai e themeloi kompaninë në vitin 2014, kur Rusia aneksoi gadishullin e Krimesë.
Përveç kompanisë Wagner, të cilën ai vetëm tani e njohu zyrtarisht, Prigozhin ishte pronar i një kompanie kateringu që merrej me darkat e shtruara nga presidenti rus, për këtë arsye u mbiquajt “kuzhinieri i Putinit”.
Duke folur për kompaninë e tij të dytë, Prigozhin pranoi gjithashtu se ajo ishte krijuar për të mbështetur separatistët pro-rusë në Ukrainën lindore.
“Me duart e mia pastrova armë të vjetra, rendita jelekët antiplumb dhe gjeta forcat speciale për të më ndihmuar. Në atë moment, më 1 maj 2014, u krijua një grup patriotësh, i cili më vonë u quajt Batalioni Vagner”, tha Prigozhin, duke theksuar se ishte krenar që mund të mbronte të drejtën e “vendit për të mbrojtur interesat e tij.”
Duke pranuar lidhjen e tij me kompaninë, Prigozhin i quajti “ushtarët e tij” heronj. Arsyeja e shpërthimit të papritur të ndershmërisë së Prigozhin nuk dihet, veçanërisht pasi ai paditi vazhdimisht mediat ruse dhe mediat perëndimore për lidhjen e tij me atë kompani.
Bashkëpronari i Wagner besohet të jetë Dmitry Utkin, një veteran i Luftës së Parë dhe të Dytë Çeçene, një nënkolonel i GRU dhe një njeri i lidhur me ultra të djathtën në Rusi. Ai e quajti grupin sipas kompozitorit të preferuar të Hitlerit. /Kosovatimes/
