Shumë tendencioze dhe në dëm të Kosovës, e ka cilësuar deputeti i LVV-së, Haki Abazi, i cili është edhe kryetar i Komisionit parlamentar për Punë të Jashtme, fjalimin e kryeministrit të Shqipërisë, Edi Rama, të mbajtur në Këshillin e Evropës.
Në fjalimin e tij, Rama kishte kërkuar rishqyrtim të rezolutës nga ana e këtij Këshilli, që u miratua pas raportit të ish senatorit Dick Marty, i cili kishte hedhur dyshime se UÇK-ja kishte kryer trafikim organesh njerëzore gjatë luftës në Kosovë.
Mbi atë raport, Këshilli i Evropës kishte miratuar rezolutën e cila kërkonte krijimin Dhomave të Specializuara.
“Kosova ka institucionet e saj dhe nuk ka nevojë z. Rama të luajë rolin e avokatit të atyre që kanë humbur zgjedhjet e më pas përfunduan në Gjykatë”, tha Abazi në konferencën e përjavshme për media të mbajtur në hollin e Kuvendit të Kosovës.
Ai tha se deri më tash, për veprimet e kryeministrit Rama është heshtur që të mos lëndohen marrëdhëniet mes Kosovës e Shqipërisë.
“Por, fjalimi i Ramës në Këshillin e Evropës e ka lënduar Kosovën”, tha Abazi, raporton RTKlive.
Deputeti i LVV-së u shpreh se Rama mund të mos e di se kush është Vuçiqi dhe nga naiviteti politik, vazhdon ta bëjë prioritet marrëdhënien me të, në dëm të Kosovës.
Abazi e cilësoi fantastike lajmin që po ringjallet Procesi i Berlinit, aty ku Kosova është palë e barabartë.
“Rama besoj se është pjesë e rrjetit politik të Ballkanit që po mbahet gjallë nga strukturat ekonomike e financiare që kane fituar nga ekonomia e luftës dhe kapitalin e njëjtë e kanë përdorur për privatizim të pas luftës”.
Abazi foli edhe për shumë tema të tjera, përfshirë edhe vizitën e emisarit Miroslav Lajçak, një ditë më parë në Kosovë, kur pikërisht po diskutohej nga Grupi Punues për procesin e liberalizimit të vizave.
“E kam thënë se z. Lajçak nuk duhet të flasë, qoftë edhe për të mirë, sa i përket liberalizimit e jo më që z. Lajçak ka përdorur të gjitha instrumentet e mundshme, përfshirë edhe vizat, për të bërë trysni mbi Kosovën, për të arritur zbatimin marrëveshjeve”, tha Abazi.
“Fakti që ai dje ishte këtu, është gabim, në momentin kur atje diskutohej për vizat”.
Ai tha se gjithashtu është gabim të vihet në Kosovë e të bëhet trysni që të mos i hiqet licenca për ‘Elektoseverin’,pasi pala serbe ka dështuar t’i përmbushë kushtet e marrëveshjes.
“Nuk është më kohë që të mbulojmë dështimet dhe paaftësinë e z. Lajçak që ta detyrojë Serbinë që të zbatojë qoftë edhe marrëveshjet e fundit për të cilat ajo (BE v.j) ka garantuar se do të jetë garant i zbatimit të tyre”.
Abazi tha se Kosova është në rrugë të drejtë dhe duhet të thuhet hapur sepse Serbia, nënshkruan marrëveshje me Rusinë kur kjo e fundit ndodhet në mes të luftës me Ukrainën, e Kosova qëndron në anën e BE-së dhe kjo nuk njihet as në Raportin e Progresit.
“Nuk përmendet fakti që Kosova ka vendosur politikën e jashtme në linjë me BE-në dhe këtë e ka bërë si një ndër vendet e para”.
Përveç tjerash, në këtë konferencë për media, foli edhe për Raportin e Progresit për Kosovën.
Ai tha se ky dokument i Komisionit Evropian nxjerr në pah shumë të meta që ka vendi e që kanë të bëjnë kryesisht me ambientin dhe ndotjen e tij.
Deputeti Haki Abazi kërkoi zyra për deputetët që të punojnë në kushte normale, përfshirë edhe mundësinë që të kalohet nga votimet me dorë në atë elektronik, në mënyrë që të lehtësohet kjo si procedurë.
