Drita edhe një herë tjetër tregoi se është një prej pretenduesve kryesorë për titull kampioni në Kosovë. Gjilanasit vazhdojnë të mbeten të vetmit në elitën e futbollit kosovar pa disfatë.
Të shtunën, Drita e trajnerit Ardian Nuhiu fitoi në udhëtim te Dukagjini me rezultatin 1:0. Golin e vetëm të ballafaqimit që u zhvillua në stadiumin “18 Qershori” në Klinë e shënoi Ardian Limani. Kapiteni i gjilanasve të Dritës realizoi supergol me gjuajtje të fuqishme nga distanca. Drita nga minuta e 89-të luajti me një lojtar më pak në fushë për shkak se Besnik Krasniqi u ndëshkua me kartonin e dytë të verdhë. Për Dukagjinin ishte disfata e parë pas dy fitoreve të njëpasnjëshme. Me rezultat të njëjtë, Drita kishte fituar ndaj Dukagjinit edhe në ndeshjen e fazës së parë të Superligës.
Drita lidere në ligë ka 27 pikë në 11 ndeshje. Dukagjini mbetet në kuotën e tetë pikëve në pozitën e parafundit.
Trajneri i Dritës, Ardian Nuhiu, e pranoi se ballafaqimet me Dukagjinin janë gjithmonë të vështira.
“Kishim parashikuar ndeshje të fortë, të luftuar. Dua t’i përgëzoj djemtë për luftën, sakrificën. Kishim diskutuar që më e rëndësishme është të merren pikët sepse fusha nuk na lejoi të bënim lojë. Lojtarët luftuan shumë dhe me shumë meritë mendoj se e morëm fitoren. Kishim raste për ta mbyllur lojën më herët, por duhet përmendur se edhe Dukagjini na vuri në vështirësi disa herë”, tha Nuhiu pas ndeshjes.
Homologu i Nuhiut, Armend Dallku, tha pas ndeshjes se skuadra e Dukagjinit nuk meritoi të mposhtej në ballafaqimin e së shtunës.
Ai vlerësoi se Dukagjini meritoi të merrte të paktën një pikë, pas asaj që shfaqi në fushën e lojës. Shtoi se klinasve u mungoi fati.
“Në momente të caktuara pasimi final nuk ishte i kënaqshëm. Fusha nuk ishte në gjendjen më të mirë, ishte problem për ta kontrolluar topin. Sot humbëm pikë, patëm më shumë nga loja, por këto ndodhin. Karakteri i lojtarëve tregoi se e deshëm barazimin, pse jo edhe fitoren. I futëm në lojë të gjithë lojtarët e fazës ofensive. Ndonjëherë edhe fati ta kthen shpinën. Sot të paktën merituam barazimin”, tha Dallku.
Fitore në ndeshjen tjetër të zhvilluar të shtunën e që i takoi xhiros së 11-të të Superligës, arriti edhe skuadra e Prishtinës.
Prishtina të shtunën në “Fadil Vokrri” mposhti Ferizajn 2:1. Golat e fitores i shënoi Leotrim Kryeziu. Ishte fitorja e parë në “Fadil Vokrri” për kryeqytetasit në këtë edicion të Superligës, dhe ishin golat e parë në këtë stadium për Prishtinën.
Ferizaj në këtë ballafaqim u udhëhoq për herë të parë nga trajneri Andrej Panadiq, që e mori drejtimin e skuadrës pas largimit të Arbnor Morinës.
Prishtina, e cila nuk e ka zhvilluar ende takimin me Trepçën ’89, ka 15 pikë pas 10 xhirove. Ferizaj i fundit ka tetë pikë.
“Me pjesën e sulmit kam qenë shumë i kënaqur. Në fakt, ne edhe në disa ndeshje tjera kemi luajtur shumë mirë në pjesën ofensive, kemi qenë të rrezikshëm, por nuk kemi shënuar. Sot bëmë një ndeshje të madhe. Megjithatë, nuk duhet të marrim gola të tillë. Duhet t’i shmangim disa gabime”, ka thënë Munishi, i cili theksoi se kampionati është i gjatë dhe gjithçka është e mundur.
Nga ana tjetër, trajneri kroat Panadiq, theksoi se Ferizaj do t’i shpëtojë rënies nga liga.
“Me njerëzit e klubit kemi thënë se bashkë do t’ia arrijmë qëllimit. Kur kam dëgjuar ambiciet e klubit kam ardhur me dëshirë të madhe. Sa i përket ndeshjes së parë, duhet të them se dallimi është i madh kur luan në bar sintetik dhe në bar natyral. Ky nuk është arsyetim, por neve na u desh të përshtatemi me fushën nga 20 deri në 25 minuta. Po thonë se Prishtina ka krizë, por unë nuk pashë krizë te Prishtina. Tani neve na duhet të përmirësohemi në disa aspekte. Besoj se do të jemi shumë më mirë”, ka thënë Panadiq.
Të dielën zhvillohen edhe tri ndeshje të tjera të xhiros së 11-të.
Trepça ’89 luan ndaj Llapit, Drenica e pret kampionin në fuqi, Ballkanin, kurse Malisheva ballafaqohet me Gjilanin.
Superliga – XI
E shtunë
Dukagjini – Drita 0:1
(Shënues: Limani 6’)
Prishtina – Ferizaj 2:1
(Shënues: Kryeziu 6’, 67’ – Hasanaj 83’)
E diel (13:00)
Trepça ’89 – Llapi
Drenica – Ballkani
Malisheva – Gjilani
- Drita 11 8 3 0 24:8 27
- Ballkani 8 7 0 1 13:5 21
- Prishtina 10 4 3 3 12:10 15
- Gjilani 10 4 3 3 11:12 15
- Llapi 9 3 3 3 11:14 12
- Drenica 10 3 2 5 11:15 11
- Trepça ’89 8 2 3 3 17:16 9
- Malisheva 10 2 2 6 16:21 8
- Dukagjini 11 2 2 7 9:14 8
- Ferizaj 11 1 5 5 10:19 8
