Këshilli i Prindërve ka reaguar përsëri kundër mbajtjes së procesit mësimor të shtunave.
Në një reagim në Facebook, ata treguan edhe njëherë që e kundërshtojnë këtë vendim të Ministrisë së Arsimit duke thënë se për këtë çështje duhet të ketë pajtueshmëri nga të gjitha palët e përfshira.
“Politikbërësit e arsimit në Kosovë po gjykojnë që gjashtë ditë rresht mësim janë të mundshme e nuk ka rëndësi a janë dakord për këtë fëmija e prindërit por edhe mësimdhënësit…Pa dakordësi e pajtueshmëri të argumentuar ne do të vazhdojmë së bëri lëvizje të çrregullta, me efekte shumëanshmërisht penguese, pa perspektivë shpresëdhënëse se arsimi publik në këtë vend mund (e do) të dalë nga prapambeturia, jokoherenca e padobishmëria”, thuhet në reagim.
Në reagim po ashtu, bëhet një krahasim me disa shtete të cilat javën janë duke e legjitimuar me katër ditë punë e tri ditë pushim në mënyrë që të ketë kreativitet më shumë tek nxënësit.
Këshilli i Prindërve kishte reaguar edhe disa herë tjera duke thënë se mësimi të shtunave është në kundërshtim me Ligjin për Mbrojtjen e Fëmijëve. /Kosovatimes/
