Ashtu siç pritej, Karim Benzema, ka fituar “Topin e Artë” për edicionin 2021/2022. Benzema ka shkëlqyer në edicionin e kaluar për Real Madridin.
Ka udhëhequr skuadrën spanjolle drejt titullit të kampionit në Ligën e Kampionëve dhe në La Liga. Sulmuesi francez ishte i pandalshëm, duke realizuar 44 gola në 46 ndeshje në edicionin e kaluar.
Në La Liga kishte 27 gola e 12 asistime në 32 paraqitje. Në 12 paraqitje në Champions, kishte shënuar 15 gola dhe kishte realizuar dy asistime. Dy gola e një asistim i kishte në dy ndeshje për Superkupën e Spanjës.
Ceremonia madhështore e “Topit të Artë” për vitin 2022, përkatësisht për edicionin 2021/2022, është mbajtur të hënën mbrëma në Paris. Vitin e kaluar fitues kontrovers i çmimit kryesor individual në futboll ishte Lionel Messi.
Shumë kanë pritur që Robert Lewandowski do të shpallej fitues, por polaku mbeti prapa argjentinasit Messi. Në vitin 2020, Topi i Artë nuk u nda për shkak të pandemisë. Messi ishte fitues edhe në vitin 2019, ndërsa në vitin 2018 fitues ishte kroati Luka Modriq.
Në fakt prej vitit 2008 e tutje kanë dominuar Messi e Ronaldo. Messi e ka fituar çmimin shtatë herë, që është rekord.
Ronaldo ka fituar Topin e Artë pesë herë. Të parin e fitoi në vitin 2008 e të fundit në vitin 2017.
Messi ndërkohë çmimin e parë e fitoi në vitin 2009 e të shtatin në vitin 2021. Messi e Ronaldo janë në fazë të vonshme të karrierës dhe mbetet të shihet nëse do të jenë fitues të “Ballon d’Or” në të ardhmen. Por kjo ka pak gjasa të ndodhë.
Messi këtë herë nuk ishte fare në listën e ngushtë, ndërsa Ronaldo u rendit i 20-ti. Benzema për kohë të gjatë ishte vlerësuar kandidati kryesor.
Me golat e tij ka udhëhequr Realin drejt triumfit në dy garat më të mëdha. Benzema fitoi para Robert Lewandowskit, Kevin de Bruynet dhe Sadio Manes.
“France Football” ka publikuar edhe renditjen pas fituesit të Topit të Artë, Karim Benzema. I dyti është Sadio Mane e pas tij janë Kevin De Bruyne e Robert Lewandowski.
Topi i Artë ndahet prej vitit 1956. Fitues i parë ishte anglezi Stanley Matthews.
Topin e Artë e ndan revista franceze “France Football”. Prej vitit 2010 e deri në vitin 2015, “France Football” kishte marrëveshje me FIFA-n dhe çmimi njihej si “FIFA Ballon d’Or”.
Partneriteti u ndërpre në vitin 2016 dhe tani FIFA ndan çmimet e saj për më të mirët e vitit. Gavi i Barcelonës e fitoi “Kopa Trophy” që i ndahet lojtarit më të mirë deri 21 vjet.
Sadio Mane ka fituar çmimin “Socrates” për ndikimin e tij në komunitet. Ky çmim u nda për herë të parë. Alexia Putellas e Barcelonës është fituese e Topit të Artë për futbolliste. Ajo u shpall më e mira e vitit për herë të dytë rresht. Robert Lewandowski fitoi çmimin “Gerd Mueller” që i ndahet golashënuesit më të mirë të edicionit, në këtë rast edicionit 2021/2022. Thibaut Courtois e fitoi çmimin “Yashin” që i ndahet portierit më të mirë. Manchester City u shpall klubi më i mirë i vitit.
