Kryetari i LDK-së, Lumir Abdixhiku, ka kritikuar deklarimet e ministrave të Qeverisë së Kosovës për njohuri dhe për padituri. Sipas tij reagimi është shumë i vonshëm. “Po bëhen gati tetë muaj që kanë filluar me rritjen e çmimeve. Sot kemi inflacion të lartë, prej se keni ju ardhur në pushtet 19.3 është inflacioni në vend”, theksoi ai.
Abdixhiku vlerësoi se mos veprimet e Qeverisë së Kosovës, për shkak të zhvillimeve në tregjet globale, kanë bërë që sot në Kosovë të kemi inflacion me 20%.
Për projektligjin, për masat e përkohshme të produkteve themelore në raste të veçanta të destabilizimit në treg, Abdixhiku tha se do të dëmtohen bizneset e vogla.
Reagimi i tij erdhi pas fjalës se Ministri i Financave, Punës dhe i Transfereve Hekuran Murati, i cili tha se ky projekt ligj do ta rregullojë problemin e çmimeve bazike.
“Rritja e çmimeve në treg ka dy faktorë kryesor kontribuues. E para është importi, për shkak se për kaq vite nuk është bërë asgjë për rritjen e kapaciteteve prodhuesve në vend, pra ne jemi vend i varur nga importet. Ne kemi filluar me masat përkrahëse dhe ato kërkojnë kohë. E para është çmimi që është rritur në nivel global dhe qeveria nuk ka kontroll dhe e dyta është me tregtar nga vendi”, tha Murati, duke përmendur se ka tregtar abuzues që e rrisin marzhën e fitimit deri në 90%.
Sipas tij ka qeveria në problemin e parë nuk do të mund të marrë masa, ndërsa me këtë projektligj, për masat e përkohshme të produkteve themelore në raste të veçanta të destabilizimit në treg, do të ndalen abuzimet dhe do të ndalë marzhën e fitimit që është në mënyrë abuzuese.
Ministri Murati mori shembull çmimin e vajit që në ditët e fundit ka ardhur me çmimin 1.40 cent ndërsa po shitet 2.60 cent dhe ky çmim është me marzhën e fitimit 90%. Sipas të parit të financave të Kosovës, heqja e TVSh-së nuk do të zgjidh problemin e çmimeve pasi që në raste të caktuara nuk është treguar funksional.
Ministrja Rozeta Hajdari, theksoi se për këtë projektligj është bërë pas një analize në treg. Ajo vlerësoi se ky ligj nuk shkel Kushtetutën e Republikë së Kosovës.
“Ky projektligj ka dalë duke u bazuar nga një grup punues. Pra është një evidencë dhe analizë. Ne nuk po adresojmë inflacionin dhe mos arsyeshmërinë e rritjes së çmimeve të produkteve në treg”, theksoi ajo.
Hajdari bëri me dije se po ndërhyjnë në çmimet e produkteve bazë, për shkak se ka produkte që shkojnë në fitim deri në 80%.
Kryetari i PDK-së, Memli Krasniqi, tha se tendenca për paraqitjen e çmimeve në treg nga qeveria se ato po manipulohen, gjoja nga disa abuzues nuk është i saktë. “Deri tash kjo qeveri, e as ministritë që e kanë si obligim primar, apo autoritetet shtetërore nuk kanë paraqitur asnjë evidencë, se rritja e çmimeve enorme po shkaktohet nga disa abuzues”, tha Krasniqi.
Sipas tij kontrolli i çmimeve më shumë shkakton probleme në ekonomi, sesa që mund të japë ndihmë tek konsumatorët. Krasniqi vlerësoi se ky projektligj është kundër Kushtetutës së Kosovës. Ai tha se projektligji ka shumë mangësi.
Edhe Mimoza Kusari nga Grupi Parlamentar i Vetëvendosjes, tha se qëllimi kryesor është i këtij ligji është ruajtja e qytetarëve dhe konsumatorëve.
“Në këtë proces është i nevojshëm mekanizmi ligjor dhe në raste të caktuara të vë kontroll”, tha ajo. Sipas saj është e domosdoshme ndërhyrja dhe marrja e masave të tilla.
Ndërsa në emër të Grupit Parlamentar të LDK-së, Hykmete Bajrami, tha se Kosova është vend me ekonomi të lirë të tregut dhe çmimet rregullohen në bazë të kërkesës dhe ofertës.
“Me këto iniciativa ligjore ju po ricikloni sisteme të kaluara”, theksoi ajo. Sipas saj ky projektligj nuk është në pajtim me Kushtetutën e Kosovës.
Lekaj: Ky Projektligj dëmton kompanitë prodhuese në Kosovë
Ndërkaq në emër të Grupit Parlamentar të AAK-së, deputeti Pal Lekaj, vlerësoi se Projektligji për masat e përkohshme të produkteve themelore në raste të veçanta të destabilizimit në treg, është në kundërshtim me Kushtetutën e Kosovës dhe kundër tregut.
“Ky Projektligj dëmton kompanitë prodhuese në Kosovë, nene dhe amendamente të caktuara dëmtojnë ekonominë e lirë dhe dëmton demokracinë në Kosovë”, theksoi ai. Sipas tij AAK, kërkon largimin e TVSh-së, për produktet bazë sesa në këtë formë sipas e sjellë në Kuvend, Qeveria e Kosovës. Lekaj bëri me dije se AAK do të votoj kundër këtij projektligji.
