Policia e Kosovës, me urdhër të Prokurorisë Speciale të Republikës së Kosovës, ka arrestuar mbrëmë një person të nacionalitetit serb, nën dyshuar se ka marrë pjesë në vrasjen e ish-politikanit serb në veriun e Kosovës, Oliver Ivanoviq.
Sipas njoftimit të Prokurorisë Speciale, i pandehuri dyshohet se është anëtar i një grupi kriminal të organizuar, i cili ka marrë pjesë aktive në kryerjen e veprave të ndryshme penale.
“Akuzohet për pjesëmarrje ose organizimi i grupit kriminal të organizuar’’ nga neni 283 paragrafi 3 lidhur me paragrafin 1 të KPRK-së, lidhur me veprat penale ‘’Vrasje e rëndë’’ sipas nenit 179 paragrafi 1.9, të KPRK-së, në vrasjen e tani të ndjerit Oliver Ivanoviq, së bashku edhe me të katër të akuzuari të tjerë, ku për të cilët është duke vazhduar gjykimi në Gjykatën Themelore në Prishtinë”, thuhet në njoftimin e Prokurorisë.
Po ashtu, i njëjti që nga fillimi i vitit 2019, ka qenë i paarritshëm për organet e ndjekjes, edhe pse ka pasur urdhërarrest në fuqi. Sipas njoftimit ai është arrestuar në orët e mbrëmjes nga Policia e Kosovës.
Ndaj të njëjtit do të vazhdohet me procedurat sipas Kodit të Procedurës Penale, ku brenda afateve ligjore do të bëhet edhe kërkesë për caktimin e masës së paraburgimit, në mënyrë që procedura penale të vazhdoj pa pengesa, thuhet në njoftim.
Oliver Ivanoq, ish-udhëheqësi i nismës qytetare serbe, “Liria, Demokracia, Drejtësia”, është vrarë më 16 janar të vitin 2018 në veriun e Mitrovicës. Për vrasjen e tij po zhvillohet një proces gjyqësor, ndërsa të akuzuar janë Nedejklo Spasojeviq, Marko Roshiq, Rade Basara dhe Silvana Arsoviq. Sipas Prokurorisë, këta persona ngarkohen se në bashkëpunim edhe me të pandehurit që janë në arrati Zhelko Bojiç, Zvonko Veselinoviç dhe Milan Radoiçiç kanë kryer vrasjen e Ivanoviqit. /Kosovatimes/
