Liberalizimi i vizave për qytetarët e Kosovës nuk duhet të mbetet peng i teknikaliteteve të reja dhe vendimmarrja politike duhet të ndodhë gjatë Presidencës Çeke. Një gjë të tillë e ka ripohuar presidentja Vjosa Osmani në vazhdën e takimeve me ambasadorë nga vendet e BE-së.
Pas takimit të sotëm me ambasadorët e Norvegjisë, Greqisë dhe Luksemburgut, presidentja Osmani ka theksuar se hyrja në fuqi e liberalizimit të vizave duhet të bëhet sipas praktikave paraprake.
“Presidentja Osmani ka ritheksuar në takim me ambasadorët se Kosova është vendi më proevropian dhe se populli i saj i ndan të njëjta vlera me popujt e tjerë evropianë. Në këtë kontekst, ka potencuar se Kosova i ka plotësuar të gjithë kriteret për liberalizim vizash, ndaj sipas saj, duhet zbatuar rekomandimi i Komisionit Evropian për heqjen e vizave”, thuhet në një komunikatë për media nga presidenca e Kosovës.
Tutje në njoftim thuhet se presidentja ka diskutuar me ambasadorët edhe për rëndësinë e mbështetjes për anëtarësimin e Kosovës në Këshillin e Evropës, me të cilën gjë qytetarëve të Kosovës u mundësohet fuqizimi i të drejtave të njeriut, demokracisë dhe sundimit të ligjit. /Kosovatimes/
