Shtyrje të afatit për targat nuk do të ketë. Këtë e konfirmoi kryeministri Albin Kurti. I pyetur nga mediat, pas fjalës që mbajti në Samitin për Ballkanin Perëndimor, që po mbahet në Prishtinë, kryeministri tha se kjo do të jetë befasi për kriminelët.
“Nuk duam të befasojmë aleatët tanë, por duam të befasojmë kriminelët”, tha Kurti.
“Fushata vazhdon, përmes mediave, takimeve me të gjithë akterët që targat RKS të shtohen e ato KM të hiqen. Ne bëjmë më të mirën e mundshme duke mos kursyer energjinë. Këto nuk janë masa kundër serbëve, por për serbët. Jemi të interesuar që të gjithë të jemi të barabartë”.
Shtyrjen e afatit për targat edhe për 10 muaj, Kosovës ia kanë kërkuar Shtetet e Bashkuara të Amerikës dhe Bashkimi Evropian.
Një kërkesë të tillë, ata e kanë arsyetuar për të shmangur tensionimin e situatës në veri.
Zgjatje të afatit për heqjen e targave ilegale kanë kërkuar edhe pjesëtarë të shoqërisë civile në Mitrovicën Veriore.
Vendimi për targat ishte paraparë të hynte në fuqi më 1 gusht, por u shty për një muaj pas incidenteve armatosura që ndodhën në veri të vendit.
Presidentja e Kosovës Vjosa Osmani, ditë më parë ka thënë se partnerët ndërkombëtarë duhet adresojnë presionin te Serbia, që është burim i tensioneve.
Ajo ka thënë se çështja e targave mbi të gjitha është çështje sundimit të ligjit. Sipas saj, mbi 90 për qind e serbëve që jetojnë në Kosovë, tashmë i kanë konvertuar targat e së kaluarës për në targa të ligjshme. /Kosovatimes/
