Në emër të tij, është krijuar një llogari në Facebook, e nga i cili janë shpërndarë sharje e fyerje. Rastin e ka paraqitur në polici, e megjithatë mllefi për këtë gjest nuk i ka kaluar. Bëhet fjalë për Rrahman Jasharajn, kryetarin e Sindikatës së Bashkuar të Arsimit, Shkencës e Kulturës (SBAShK).
Me një letër dërguar mediave, Jasharaj ka njoftuar se në emrin e tij është hapur një llogari në rrjetin social në Facebook e nga i cili janë sharë e fyer persona të ndryshëm.
“Mendova se greva u pezullua dhe se “luftën “ me mua e përfunduan langoit e sahanlëpirësit e pushtetit, por doli se kjo nuk është ashtu”, shkruan Jasharaj, duke pretenduar se një veprim të tillë e kanë bërë persona të caktuar kanë lidhje me qeverinë.
“Vërejta se nuk paska fund poshtërsia të ca krijesa, që ngjasojnë, por nuk janë njerëz. Unë kisha mbyllur rrjetin social sepse më fyenin e më shanin pa as edhe një arsye, por vetëm sa për t’i hyrë në qejf të madhit”, shkruan Jasharaj, pa përmendur emra se kush është “i madhi” të cilit i referohet.
“Nuk paska fund poshtërsia e të pafytyrëve sepse një individ, që fatkeqësisht ka humbur gjithë njerëzoren, paska hapur një profil në Facebook me foton time nga një emision shumë i shikuar televiziv dhe çdo gjë dukej sikur ai është Facebook-u im”.
Më tej, Jasharaj tregon se i tmerruar nga ky realitet, ka shkuar në polici në Pejë dhe e ka lajmëruar rastin.
“Policia bëri gjithë të duhurat dhe u ndjeva edhe një herë krenar që Kosova ka djelmosha e vajza të tilla që kryejnë me përkushtim detyrën e tyre”, shkruan kreu i Sindikatës së Bashkuar të Arsimit, Shkencës e Kulturës.
Ai ka thënë se kërkon falje nëse ndonjë mesazh fryrës nga ky profil ka shkuar.
Rrahman Jasharaj ishte në qendër të kritikave të ndryshme gjatë muajit shtator, kur edhe u mbajt greva në arsim dhe administratën publike. /Kosovatimes/
