Kryetari i Prishtinës, Përparim Rama, deklaroi se testimi i qarkullimit të automjeteve në kryeqytet, të premten dhe në fundjavë, për dallim nga herët e kaluara, bëhet për të kuptuar problemet në komunikacionin.
“Kemi bërë dhe teste të mëparshme gjatë vikendit për ta testuar qendrën. Propozimet të cilat kanë ardhur si pjesë e testimeve për mobiliet, si pjesë e planit për testimin e mobilitetit ku e kemi bërë testimin të shtunën, të dielën, faktikisht kemi bërë për dy javë, ku para se të merret vendimi duhet që të testohet edhe gjatë javës”, tha Rama në një deklarim për media.
Ai u shpreh se ky testim, tregon pikat e ndryshme ku janë, e që krijojnë probleme, pika që duhet të ndryshohen, e të transformohen për të krijuar një komunikim më të lirshëm për kryeqytetin.
Ai përmendi edhe projektet për rrugën A, ku në fund do të bëjnë një raport përfundimtar për këtë testim.
“Kemi informata të sakta se ku janë problemet, prej nga po krijohen problemet në mënyrë që të kemi këtë informatë për përmirësimin e gjendjes në trafik”, tha Rama.
“Kemi paralelisht dhe projekte që i kemi dhe janë më se të nevojshme të rrugës A, rruga B e ndërlidhur me rrugën A, po ashtu edhe unazës së mesme që janë pjesë të procesit për transformim të kryeqytetit…Ekipet janë në terren normal që do të vijmë me një raport final në fund të eksperimentimit”.
Kryetari i Prishtinës, Përparim Rama tha se është normale që në fillim të këtij testimit të ketë kolona.
Megjithatë, ai tha se qytetarët duhet të presin dhe më pas do të shihen ndryshimet pozitive që do të bëhen me këtë testim të rrugës njëkahore.
Postimi më i ri i kryetari të Komunës së Prishtinës, Përparim Rama, në Facebook, lidhur me testimin e qarkullimit në trafik. /Kosovatimes/
