Ambasadori rus Aleksandar Bochan-Kharchenko tha se Rusia i është mirënjohëse Beogradit për “qëndrimin parimor për distancim” nga, siç tha, kufizimet jolegjitime antiruse, përkatësisht sanksionet e vendosura nga ShBA-ja dhe vendet perëndimore.
“Sigurisht, do të ishte e padrejtë – dhe e gabuar, duke qenë se ne kemi marrëdhënie miqësore me Serbinë të bazuara në besim – të mos themi se rishikimi i kësaj linje do të na zhgënjejë,” tha Kharchenko.
Duke iu përgjigjur pyetjes nëse Moska do të “tregtojë” Kosovën në këmbim të Donbasit dhe territoreve të tjera, ai tha se këto deklarata “nuk kanë të bëjnë me realitetin” dhe se nuk mund të flitet për “tregti”.
“Qëndrimi i Rusisë për çështjen e Kosovës është parimor dhe konsistent, i pavarur nga konjuktura. “Ne mbrojmë arritjen e një zgjidhjeje të qëndrueshme, reciprokisht të pranueshme ndërmjet Beogradit dhe Prishtinës, në koordinatat ligjore ndërkombëtare, bazuar në Rezolutën 1244 të Këshillit të Sigurimit të Kombeve të Bashkuara”, tha Harçenko. /Kosovatimes/
