Disa muaj pas marrjes së Mariupolit nga forcat ruse, shfaqen imazhe të një qyteti ende të rrënuar.
Këto foto, që u publikuan nga Reutersi më 30 tetor, ofrojnë një pamje të rrallë brenda Mariupolit të pushtuar nga Rusia, pesë muaj pasi Moska mori kontrollin e qytetit port të Ukrainës.
Imazhet e qytetit të shkatërruar u bënë emblemë e pushtimit rrënues të Ukrainës nga ana e Rusisë, por muajt e fundit vetëm herë pas here janë publikuar foto nga agjencitë shtetërore të lajmeve të Rusisë.
Mariupoli u pushtua nga forcat ruse në maj pas disa muaj luftimesh që lanë rreth 90 për qind të ndërtesave të qytetit të dëmtuara ose të shkatërruara. Mijëra njerëz vdiqën në atë që u bë i njohur si rrethimi i Mariupolit.
Puna për rindërtim nisi pothuajse menjëherë pas pushtimit nga Rusia nëpër disa ndërtesa në qendër të Mariupolit, por imazhet në këtë galeri që u publikuan nga Reuters më 30 tetor, tregojnë se zona të mëdha të qytetit mbeten të pabanueshme.
Fabrika për përpunimin e metalit, Azovstal, ishte streha e fundit për anëtarët e Azovit, një regjiment i diskutueshëm ukrainas që më parë përdorte imazhe neo-naziste në uniformat e tij.
Presidenti rus, Vladimir Putin, fillimisht pretendoi “de-nazifikimin” si një justifikim të pushtimit të Ukrainës në shkurt, por Kremlini kohët e fundit e ka cilësuar konfliktin si një luftë kundër “satanizmit”.
Sipas agjencisë ruse të lajmeve, TASS, në zonën përreth Azovstalit do të bëhet një “park industrial, një park teknologjik, një eko-park dhe një qendër transporti dhe logjistike” me një kosto prej rreth 831 milionë dollarësh.
Mariupoli dikur ishte shtëpia e rreth 431.000 njerëzve, kurse sot vlerësohet se kanë mbetur në qytet më pak se një e katërta e këtij numri.
