Zyra e Prokurorit të Specializuar (ZPS), ka kërkuar vazhdimin e paraburgimit ndaj ish-kryeparlamentarit të Republikës së Kosovës, Kadri Veselit, i cili po akuzohet për krime lufte.
Sipas shkresës së prokurorisë, gjyqtari i procedurës paraprake konstatoi se vazhdon të ekzistojë dyshimi i bazuar se Veseli ka kryer krime brenda juridiksionit lëndor të Dhomave të Specializuar.
“Apeli më i fundit për Mbrojtjen e Veselit nuk e kundërshtoi këtë konstatim. As nuk ka ndonjë ndryshim në rrethana për të garantuar një përcaktim të ri për ekzistimin e një dyshimi të bazuar. Përfundimi i gjyqtarit të procedurës paraprake vazhdon të jetë i qëndrueshëm”, thuhet në shkresën e ZPS-së.
Ndërkaq, ZPS-ja konsideron se vazhdon të ekzistojë rreziku i arratisjes.
“Rritja e provave që i janë zbuluar Veselit, në lidhje me mundësinë e një dënimi të rëndë në rast të një dënimi, mund të ofrojnë nxitjen e nevojshme për Veselin që të marrë fonde dhe mjete për të udhëtuar dhe përfundimisht t’i shmanget procedurave të Dhomave të Specializuara”.
“Se Veseli do të kishte mjetet për ta bërë këtë, mbështetet, ndër të tjera, nga ndikimi i tij i vazhdueshëm në Kosovë, i konfirmuar nga gjyqtari i procedurës paraprake dhe i vërtetuar më parë nga Kolegji i Apelit, duke përfshirë edhe për shkak të pozitave të tij të mëparshme në lidhje me inteligjencën”, ka pretenduar prokuroria.
Ndër të tjera, Dhoma e Specializuar e Gjykatës Kushtetuese, e përbërë nga gjykatësit Vidar Stensland, Rumen Nenkov dhe Romina Inkuti, ka nxerr vendim edhe mbi kërkesën referuese të Pjetër Shalës që pretendonte shkelje të të drejtave themelore të tij dhe paraqiste kundërshtime lidhur me juridiksionin e DShSK-së.
Sipas vendimit të siguruar nga Betimi për Drejtësi, Dhoma vëren se parashtruesi u ankua se ndjekja e tij penale bazohet në disa akuza që shkelin të drejtat e tij themelore të garantuara me Kushtetutë.
“Në mënyrë të veçantë, parashtruesi u ankua se paraburgimi arbitrar si krim lufte dhe NPK-ja si një mënyrë e përgjegjësisë penale individuale: (i) ishin bazuar në një burim të pazbatueshëm të ligjit, përkatësisht të drejtës ndërkombëtare zakonore, pa ndonjë akt ligjor të brendshëm; (ii) nuk janë parashikuar në ligj; dhe (iii) nuk përbënin krime sipas të drejtës ndërkombëtare zakonore gjatë periudhës së aktakuzës”, thuhet në vendim.
Në Hagë të paraburgosur janë edhe: Hashim Thaçi, Rexhep Selimi, Jakup Krasniqi, Salih Mustafa, Hysni Gucati dhe Nasim Haradinaj.
Në vitin 2021, Gjykata Speciale ka ngritur aktakuzë ndaj ish-liderëve të UÇK-së të cilët i akuzon për krime lufte.
