Ish -kryeministri i Kosovës, Avdullah Hoti, e ka quajtur dështim total të qeverisë menaxhimin e buxhetit sipas tij në kohën e krizës më të madhe ekonomike. Nga janari deri në shtator të këtij viti, sipas tij vetëm 21 për qind e investimeve kapitale janë realizuar.
“158 milion nga 764 milion të planifikuara. Kjo është 29% më pak se më 2021 dhe 24% më pak se më 2020”, ka shkruar Hoti.
Thotë se për shkak të mosrealizimit të shpenzimeve kapitale, ekonomisë i mungojnë rreth 200 milionë euro në qarkullim. Sipas ish-kryeministrit paratë e gatshme në llogarinë e Qeverisë kanë arritur në 678 milionë euro, dyfish më shumë sesa që është e nevojshme.
“Rrjedhimisht, mund të ishte pezulluar akciza në naftë, si dhe përgjysmuar TVSH-ja në naftë dhe në mallra ushqimore, pa shkaktuar asnjë vështirësi buxhetore për Qeverinë”, ka vazhduar ai.
Kritika për Qeverinë pati edhe bashkëpartiakja e Hotit, ish Ministrja Hykmete Bajrami.
Sipas saj, buxheti për vitin 2023 nuk e parasheh zbatimin e Ligjit të pagave, e as rritje pensionesh.
“Kur Kosova po përballet me inflacion, Qeveria e Kosovës ka propozuar ”buxhetin më të madh në histori”, ku nuk përfshinë rritje të pensioneve. Nuk ka paraparë as kosto për zbatimin e Ligjit të pagave. Pra, nuk ka paraparë rritje pagash, nuk ka paraparë as indeksim të pensioneve dhe pagave për normën e inflacionit”, ka shkruar ajo.
Tutje deputetja e LDK-së ka shkruar se në gjithë këtë situatë, Qeveria nuk ka asnjë plan.
“Ndoshta, kjo Qeveri ka plan të ikë sepse deri më tash s’po shohim as hapa minimal për t’u përballur me këtë situatë të rënduar”, shkroi tutje ajo.
Sipas Bajramit partia në pushtet dhe komplet Qeveria janë kurthuar në temën e targave.
“Kanë shndërruar dialogun me Serbinë në temë qendrore. Konfrontimin me SHBA-në dhe BE-në e kanë bërë përditshmëri”.
