Elon Musk do të fillojë sot pushimet masive në Twitter, duke reduktuar ndjeshëm fuqinë punëtore të platformës së mediave sociale, tha kompania në një email drejtuar stafit të enjten.
“Në përpjekje për ta vendosur Twitter-in në një rrugë të shëndetshme, ne do të kalojmë përmes procesit të vështirë të reduktimit të fuqisë sonë punëtore globale të premten”, thuhet në email. New York Times dhe Washington Post raportuan të dy për pushimet nga puna dhe cituan emailin e brendshëm.
Sipas “Bloomberg” rreth 3700 punonjës do të pushohen nga puna.
“Bloomberg” gjithashtu raportoi se Musk planifikon të ndryshojë politikën ekzistuese të kompanisë së mediave sociale për punën në distancë dhe do të kërkojë që punonjësit të punojnë nga zyra tani, megjithëse mund të bëhen disa përjashtime.
Vlen të përmendet se Elon Musk, në një postim në Twitter, mohoi një raport të ngjashëm të New York Times se ai planifikoi të pushonte punonjësit e Twitter përpara 1 nëntorit në mënyrë që të shmangte skadimin e granteve të aksioneve atë ditë.
Pas emailit që u shpërnda dje, një prej punonjëseve ka publikuar në llogarinë e saj në twitter një foto të emailit zyrtar të punës të cilin nuk mund ta aksesojë më për shkak se i është ndërruar fjalëkalimi.
