Drama që filloi të shtunën me largimin e përfaqësuesve serbë nga institucionet e Kosovës nuk i duket fundi. Prishtinës i janë dorëzuar dy kërkesa – të formohet Unioni i Komunave Serbe të paraparë në Marrëveshjen e Brukselit dhe të anulohet riregjistrimi i automjeteve me shenjat e qyteteve serbe. Pasi policët serbë hoqën uniformat të shtunën, dje në Mitrovicë u mbajt një proteste e madhe publike, nga e cila zyrtarët serbë përshëndetën Milan Radoiçiqin, një person nga lista e zezë amerikane. Opinionet janë të ndara dhe sipas bashkëbiseduesve të Nova.rs ka disa epilogë të mundshëm.
Ndërkohë në Beograd është mbajtur mbledhja e qeverisë, ku presidenti serb Aleksandar Vuçiq ka zhvilluar takime me ambasadorin kinez dhe rus, ndërsa me atë amerikan ka folur në telefon. Tensionet janë ngritur në maksimum.
Një ditë pasi përfaqësuesit e serbëve u larguan nga institucionet e Prishtinës, dje në mesditë filloi një takim i madh publik në Mitrovicë.
Bllof i Listës Serbe
Ish-ministri për Kosovë dhe Metohi Goran Bogdanoviq thotë për Nova.rs se tensioni dhe frika në mesin e qytetarëve në veri të Kosovës është e madhe.
“Situata në veri është shumë e tensionuar, nuk e dini se çfarë do të ndodhë nesër, sepse është krijuar një hapësirë boshe ku mund të vijnë grupe të ndryshme, njerëzit kanë frikë se Prishtina do të marrë pushtetin lokal, stacionet policore dhe do të çojë në terror. . Mendoj se shkaktoi vetëm një problem edhe më të madh. Kjo nuk është zgjidhje”, thotë Bogdanoviq për Nova.
Ende nuk dihet numri i saktë i serbëve që janë larguar nga institucionet, por Bogdanoviq beson se ata mund të jenë disa mijëra dhe se tani janë praktikisht pa punë.
“Kjo sigurisht është bërë në marrëveshje me Beogradin zyrtar, këtu nuk bëhet asgjë pa marrëveshje me Serbinë dhe pa bekimin e autoriteteve serbe. Pas këtij vendimi sigurisht që qëndrojnë Beogradi dhe Aleksandar Vuçiq, të cilët me siguri po mendonin edhe për ata njerëz që humbin punën, se si do të ndihmohen. Nuk janë pesë apo 10 veta, janë disa mijëra. Ende nuk e dimë numrin e saktë, por do të shohim pas disa ditësh nëse kanë dalë të gjithë serbët dhe qeveria e Kosovës, policia, apo ky është një tjetër bllof i listës serbe. Nuk përjashtohet që për disa ditë të gjithë të kthehen në institucione, por nëse kësaj nuk i paraprin përmbushja e disa kërkesave që vijnë nga pala serbe, atëherë e gjithë kjo është e pakuptimtë”, thotë Bogdanoviq.
Shantazh i suksesshëm
Analisti politik Boshko Jakshiq beson se kjo situatë mund të zgjasë për një kohë, por jo në njeafat të gjatë.
“Personalisht, mendoj se është një hap i mirë, sepse padyshim bëhet fjalë për presion mbi autoritetet në Prishtinë në një kohë kur Albin Kurti nuk ka stabilitet politik. Pra, nëse ky është një hap që synon ta detyrojë Kurtin të formojë Unionin e Komunave Serbe, atëherë është një hap i mirë negociator. Sepse status quo-ja dhe fakti që i gjithë problemi i Kosovës ka ardhur deri në çështjen e targave është i çuditshëm. Më duket se ky presion mund ta lëkundë pak edhe Prishtinën edhe Perëndimin. Praktikisht tani kemi një konflikt mes dy grupeve shantazhuese. Deri më tani kishim vetëm një shantazhues nga Prishtina, tani i është bashkuar edhe potenciali shantazhues serb”, thotë Jakshiq.
Ai beson se është problem i madh nëse çdo gjë bëhet pa plan.
“Para së gjithash, për njerëzit që jetojnë në veri të Kosovës. Fakt është se pasojat i kanë vuajtur prej dekadash për shkak të veprimeve të palës shqiptare dhe serbe. Kjo do të rrezikojë më tej të gjithë ata që ishin të punësuar në administratë. Nëse paraprakisht nuk vendoset që t’u jepet ndihmë financiare dhe ndonjë burim i ri të ardhurash, do të ndodhë e njëjta gjë siç ndodhi disa vite më parë, kur ata lanë punën, mbetën pa para dhe më pas u kthyen, dhe më pas e gjithë kjo nuk kishte asnjë efekt”, thekson Jakshiq një nga opsionet që mund ti presë.
Mund të lindin konflikte
Analisti politik Nexhmedin Spahiu nga Prishtina beson se çështja është shumë më serioze se sa shantazhi dhe tensionet e zakonshme të inskenuara që i shohim me muaj e vite. Ai tha për gazetën se i duket se mund të ketë konflikt.
“Shpresoj që kjo të jetë një shfaqje tjetër, por fatkeqësisht kam përshtypjen se po përgatitet një akt lufte, se po i afrohemi një konflikti. Duket se Serbia e refuzoi propozimin e Gjermanisë dhe Francës, prandaj gjithçka është komplikuar edhe më shumë dhe se në horizont është një konflikt dhe pastaj gjithçka do të zgjidhet nga NATO. E gjithë kjo bëri jehonë te autoritetet e Prishtinës dhe ata besojnë se kjo është një çështje e rrezikshme. Ajo që bënë policët interpretohet edhe si përgatitje e tyre, si forcë potenciale për konflikt”, përfundon Spahiu.
I pyetur nëse ka ndonjë shans që Prishtina të pranojë kërkesën për formimin e AKS Spahiu thotë: “AKS vlen vetëm si shkëmbim për njohje nga Serbia. Ai opsion vlen vetëm nëse Beogradi pranon ta njohë pavarësinë e Kosovës”, thotë Spahiu. /Kosovatimes/
