Kryeministri Albin Kurti ka komentuar shtyrjen e afatit për shqiptimin e gjobave për të gjithë qytetarët që nuk i kanë konvertuar targat ilegale në RKS. Ai ka thënë se të hënën deri vonë ka diskutuar me ambasadorin amerikan Jeff Hovenier për gjetjen e një zgjidhjeje.
Kurti e ka falënderuar atë për përkushtimin dhe angazhimin e tij në këtë çështje, përderisa ka thënë se nuk ka komunikuar me kryediplomatin evropian, Josep Borrell pas shtyrjes së vendimit për gjobat rreth targave për 48 orë.
Në një deklarim për medie, Kurti insistoi se Borrell e ka braktisur propozimin franko-gjerman për normalizim të marrëdhënieve Kosovë-Serbi. I pyetur se a janë duke u përfshirë në mënyrë direkte Shtetet e Bashkuara të Amerikës në procesin e dialogut për të gjetur një zgjidhje, kreu i ekzekutivit u shpreh se po bëjnë përpjekje maksimale dhe se janë në kontakt me Brukselin.
Kryeministri Kurti me propozim të ambasadorit amerikan Hovenier vendosi të shtyjë për 48 orë vendimin për targat.
