OJQ-ja AVONET është shprehur tejet e shqetësuar me rastin e vrasjes makabre të shtatzënës nga komuna e Lipjanit në Repartin e Gjinekologjisë në QKUK.
AVONET-i, përmes një reagimi, thotë se kanë mbetur të tronditur me neglizhencën e institucioneve, ku vetëm gjatë këtij viti kemi pesë gra të vrara, të cilat tashmë kishin alarmuar të gjitha institucionet relevante për dhunën psikike dhe fizike që po ndodhte ndaj tyre.
“Lidhur me rastin në fjalë, Gjykata Themelore e Ferizajt ka lëshuar Aktvendimin për urdhër mbrojtje, më 13.09.2022, me kërkesë nga Zyra për Mbrojtjen e Viktimave, që funksionon në kuadër të Prokurorisë së Shtetit, i cili ishte në fuqi deri në muajin mars 2023, dhe Gjykata Themelore e Ferizajt të njëjtin e kanë dënuar me gjobë për armëmbajtje pa leje, me ç’rast Prokuroria Themelore e Ferizajt ka ngritur aktakuzë ndaj S.H. për veprën penale ‘Kanosje’”.
“Duke qenë në dijeni Gjykata Themelore e Ferizajt se i njëjti ishte recidivist i veprave penale, gjykatësi ka neglizhuar dhe ka vënë në rrezik jetën e tashmë viktimës, duke marrë parasysh se ky gjykatës të njëjtin e ka dënuar me dënim me gjobë për ‘Armëmbajtje pa leje’, duke pasur parasysh rrethanat dhe dashjen e kryesit të veprës penale”, thuhet në reagimin e AVONET-it.
Sipas tyre, Gjykata Themelore e Ferizajt ka treguar mungesë profesionalizmi, çka bëri që tash S.H, të kryente veprën penale të “Vrasjes me paramendim”, duke pasur mundësi që të endet i lirë, përkundër denoncimeve të vazhdueshme nga e ndjera.
“Në këtë rast ka dështuar edhe Policia e Kosovës, e cila është përgjegjëse për sigurinë e viktimave të dhunës në familje dhe zbatimin të urdhrave për mbrojtje”.
“Po ashtu, institucionet e Republikës së Kosovës deri më tani nuk kanë marrë asnjë veprim për mbështetjen e qendrave për punë sociale, si në aspektin logjistik dhe profesional, shumica e QPS-së nuk kanë automjete të tyre dhe mungesë stafi e hapësirave dhe fondeve emergjente”, thotë AVONET-i.
Ata kanë kërkuar nga Këshilli Gjyqësor i Kosovës që të marrë masa urgjente ndaj Gjykatës Themelore të Ferizajt dhe gjykatësit të çështjes për neglizhencë, mosprofesionalizëm dhe mosefikasitet.
Po ashtu kanë kërkuar edhe nga Faik Hoti, u.d. i drejtorit të përgjithshëm i Policisë së Kosovës të marrë masa urgjente ndaj Stacionit Policor Lipjan, për mosofrimin e sigurisë së të ndjerës. /Kosovatimes/