Lidhur me vrasjen e së mërkurës në mbrëmje të një gruaje shtatzënë në oborrin e Klinikës së Gjinekologjisë në QKUK, ka reaguar edhe Këshilli për Mbrojtjen e të Drejtave dhe Lirive të Njeriut (KMDLNj).
Pasi shpjegohet e gjithë ngjarja që i parapriu këtij akti, ku gruaja kishte denoncuar ish bashkëshortin për dhunë të ushtruar ndaj saj, e që dyshohet të jetë edhe autor i kësaj vrasjeje, KMDLNj e gjykon këtë rast si shkelje flagrante e të drejtës kryesore të njeriut për jetë, mbi të cilën ndërtohen të gjitha të drejtat tjera.
“KMDLNj-ë vlerëson se vrasja e H. M është pasojë e drejtpërdrejtë e dështimit të mekanizmave mbrojtës të shtetit të cilat, përkundër faktit se kanë qenë të informuara për rastin”, deklaron ky Këshill.
“Në vend se të marrin masa për mbrojtje efektive të viktimës së ekzekutuar, janë mjaftuar me masa të përkohshme, të buta e që e kanë inkurajuar dorasin ta bëjë këtë krim”.
KMDLNj kërkon dhe pret që Policia e Kosovës sa më shpejt të jetë e mundur, të arrestojë të dyshuarin për vrasjen e H. M dhe në bashkëpunim me institucionet tjera përgjegjëse, ta nxjerrin atë para organeve të drejtësisë.
Për rastin, ka reaguar Avonet, Rrjeti i Organizatave Joqeveritare. Ky grup organizatash kërkon që të thirren në përgjegjësi gjykatësi i Gjykatës Themelore në Ferizaj dhe Policia e Kosovës.
I pari përse nuk ka marrë parasysh se i dyshuari që tashmë ka kryer krimin, ishte përsëritës i shkeljeve të ligjit dhe ka mbajtur armë pa leje, kurse policia përse nuk ka siguruar mbrojtjen e viktimës edhe pse kishte një urdhër mbrojtjeje. /Kosovatimes/
