Falë një paraqitjeje brilante të Denzel Dumfriesit, Holanda ka siguruar çerekfinalen e Kupës së Botës që po mbahet në Katar.
Dumfries ishte i jashtëzakonshëm të shtunën te Holanda, që arriti fitore 3:1 ndaj Shteteve të Bashkuara të Amerikës.
Dumfries asistoi në dy gola, ndërsa shënoi një tjetër vetë. Mbrojtësi i Interit asistoi për Memphis Depayn në minutën e 10-të, dhe për Daley Blindin në minutën e parë të kohës shtesë në pjesën e parë.
ShBA-ja ngushtoi epërsinë me zëvendësuesin Haji Wright në minutën e 76-të, por Dumfries shfrytëzoi për mrekulli asistimin e Blindit në minutën e 81-të, dhe vulosi rezultatin final të takimit dhe kualifikimin tutje të Holandës.
Holanda, çerekfinalistja e parë e Botërorit, do të luajë me fituesin e ndeshjes Argjentina – Australia.
