Përfaqësuesi i Lartë i BE-së për Politikë të Jashtme, Josep Borrell e konfirmoi sot nga Tirana, ku po merr pjesë në Samitin BE-Ballkan Perëndimor, se dje Serbisë e sot Kosovës, u janë dorëzuar versionet e fundit të tekstit mbi propozimin për marrëveshje mes dy vendeve.
Borrell deklaroi për media, para fillimit të punimeve të samitit, se duhet të nisin bisedime serioze midis Kosovës dhe Serbisë për çështjen e dialogut.
“Tani duhet të angazhohemi vërtet në dialog”, tha ai.
“Me propozimet që ka bërë BE-ja, me mbështetjen e Francës dhe Gjermanisë, versioni i fundit i tekstit është dërguar dje në Beograd dhe sot në Prishtinë”, tha Borrell.
“Duhet të nisin bisedime serioze sepse është një mundësi shumë e madhe”.
Borrell deklaroi se e rëndësishme është që të mos vendoset datë, por të fillohet me punën, kurse për palët tha duhet të angazhohen vërtetë në dialog.
Në një postim në llogarinë e tij në Twitter, Borrell u shpreh se Samiti BE-BP në Tiranë, rikonfirmon partneritetin strategjik mes BE-së dhe BP, me synim të qartë, anëtarësimin e rajonit në BE.
