Pritje të veçantë u ka rezervuar kryeministri i Shqipërisë, Edi Rama, liderëve të BE-së, atyre të 27 shteteve anëtare si dhe liderëve të gjashtë vendeve të Ballkanit Perëndimor.
Në kuadër të Samitit BE- Ballkan Perëndimor që po mbahet në Tiranë, tashmë është realizuar edhe pika e tjetër e parashikuar në agjendën e këtij takimi.
Ajo është realizimi i fotografisë familjare, ku të radhitur ishin të gjithë liderët e vendeve të BE-së dhe Ballkanit Perëndimor (përveç atij të Spanjës, pasi ky shtet ka sot festë kombëtare).
Megjithatë, Rama nuk la që një rast i tillë t’i ikë, pa treguar mikëpritjen shqiptare.
Kjo meqë pas fotografisë së realizuar, para liderëve evropianë, u mbajt edhe një koncert i shkurtër me këngë e valle, që përfshinte të gjitha trevat shqiptare.
Koncerti para mysafirëve evropianë filloi me këngë malësie, për të vazhduar me valle labërie, më pas vallën e veriut, që më shumë ngjasonte me atë të Kosovës.
Koncerti vazhdoi me një arie të një opere, pastaj me kërcim modern të fëmijëve.
Tani liderët kanë hyrë në takim kurse më vonë, do të mbahet konferencë e përbashkët për media e kryeministrit Edi Rama, presidentit të Këshillit Evropian, Cherles Michel si dhe presidentes së Komisionit Evropian, Ursula von der Leyen.
