Presidentja e Kosovës, Vjosa Osmani, tha se veriu i Kosovës, vazhdon të jetë sfidë për shkak të, siç tha, “pretendimeve territoriale të Serbisë”.
Gjatë fjalimit vjetor para deputetëve të Kuvendit të Kosovës, Osmani sërish akuzoi Serbinë se mbështet “grupet kriminale” në veri të Kosovës.
“Veriu i Kosovës vazhdon të jetë sfidë për shkak të pretendimeve territoriale që Serbia ka ndaj Kosovës, e të cilat i shpreh përmes financimit dhe përkrahjes së strukturave ilegale-kriminale. Por, ne jemi të vendosur si asnjëherë më parë që të krijojmë siguri e sundim të ligjit në çdo cep të territorit tonë”, tha Osmani.
Ajo u zotua se institucionet e Kosovës janë të vendosura për të ofruar siguri për qytetarët e Kosovës që jetojnë në këtë pjesë, teksa tha se “bandave kriminale” nuk po u pëlqen vendosmëria e institucioneve për sundim të ligjit.
“Ata do të përballen me drejtësinë për veprat penale kundër rendit kushtetues dhe kërcënimit e frikësimit të qytetarëve”, theksoi Osmani.
Presidentja e Kosovës e cilësoi si “ide hegjemoniste” paralajmërimin e Serbisë se do të kërkojë nga KFOR-i që t’i kthejë trupat serbe në Kosovë.
“Jemi të gjithë dëshmitarë të kërcënimit të vazhdueshëm të Serbisë ndaj Kosovës. Ky kërcënim, me përmasa agresioni, së fundi është shpërfaqur nëpërmjet idesë hegjemoniste të vendosjes së trupave ushtarake të Serbisë në Kosovë. Por, Serbia dhe udhëheqësi i saj [Aleksandar] Vuçiq, e dinë fare mirë se prezenca e ushtrisë serbe në territorin e Kosovës mori fund një herë e përgjithmonë më 12 qershor 1999″, tha Osmani.
Presidentja e Kosovës porositi se procesi i dialogut me Serbinë – që ndërmjetësohet nga Bashkimi Evropian – duhet të përqendrohet në njohje të ndërsjellë, që, sipas saj, do të ishte garanci për paqe të qëndrueshme dhe afatgjatë.
Gjatë fjalimit, Osmani po ashtu foli për politikën e jashtme duke thënë se në rrafshin diplomatik, shteti ka qenë aktiv. Ajo tha se në Serbi dhe jashtë saj, ka njerëz që kjo gjë u pengon, duke theksuar se “më në fund Kosova ka politikë të jashtme”.
Osmani tha se në Kosovë më nuk ka “lobim për ndryshim kufijsh” dhe “nuk ka flirtime me Serbinë dhe Rusinë me qëllim të interesave individuale”.
“Natyrisht që, kjo politikë e jashtme e fokusuar në interesin e Kosovës dhe vetëm të Kosovës, e jo të interesave të ngushta individuale e shpeshherë të paligjshme, po u pengon disave, jo vetëm në Serbi por edhe jashtë saj. “Kosova nuk ka politikë të jashtme”, thonë ca zëra. Natyrisht që Kosova ka politikë të jashtme. Në fakt, më në fund, Kosova ka politikë të jashtme. Por, po ju tregoj se çfarë nuk ka Kosova tani: Nuk ka lobim për ndryshim kufijsh, nuk ka pagesa lobistësh për të shtyrë përpara agjenda individuale, nuk ka intervista të paguara për të promovuar liderë të caktuar, nuk ka flirtime as me Serbinë e as me Rusinë me qëllim të interesave individuale, nuk ka udhëheqës që Kosovën e krahasojnë me Nagorno Karabakh e me Abkhazi e me Krime. Koha e tregtarëve të kufijve ka perënduar njëherë e përgjithmonë!”, ka theksuar ndër të tjera Presidentja Osmani.
Sipas saj, sfidat e politikës së jashtme janë të panumërta, sepse gabimet kanë qenë të përmasave të mëdha. “Përfundimisht, politika e jashtme e Kosovës sot është në shërbim të plotë e funksion të forcimit të shtetësisënë arenën ndërkombëtare dhe konsolidim të Kosovës si faktor kyç i stabilitetit dhe prosperitetit në rajonin tonë e përtej”, tha ajo.
Osmani: Ushtria serbe në Kosovë mori fund përgjithmonë më 1999
Presidentja e Republikës së Kosovës, Vjosa Osmani, në fjalimin e saj vjetor drejtuar Kuvendit të Republikës së Kosovës, tha se jemi dëshmitar të kërcënimit të vazhdueshëm të Serbisë ndaj Kosovës.
“Ky kërcënim me masa agresioni së fundi është shpërfaqur nëpërmjet idesë hegjemoniste të vendosjes së trupave ushtarake serbe në Kosovë, por Serbia dhe udhëheqësi i saj Vuçiq e dinë fare mirë se prezenca e ushtrisë serbe në territorin e Kosovës mori fund njëherë e përgjithmonë më 12 qershor 1999”, tha ajo.
Osmani tha se qëllimi i Serbisë ishte shfarosjen e popullit të Kosovës.
Presidentja Osmani i drejtohet Kuvendit
Presidentja e Republikës së Kosovës, Vjosa Osmani, sot nga ora 9:30, do t’i drejtohet Kuvendit të Republikës së Kosovës.
Në kërkesën e Osmanit Konjufcës, ajo shprehet e gatshme të flas në Kuvendin e Kosovës.
“Neni 84, paragrafi 30 i Kushtetutës së Republikës së Kosovës përcakton se Presidenti i Republikës së Kosovës, së paku një herë në vit i drejtohet Kuvendit të Kosovës përkitazi me fushëveprimtarinë e tij. Rrjedhimisht, duke u bazuar në Kushtetutën e Republikës së Kosovës dhe praktikave të deritanishme, ju njoftoj që si Presidente e vendit jam e gatshme t’i drejtohem Kuvendit të Republikës së Kosovës”, thuhet në letrën e Osmanit.
