Pas fjalimit historik të mbrëmshëm të presidentit ukrainas Volodymyr Zelensky në Kongresin Amerikan, pati duartrokitje që zgjatën disa minuta. Kamera kapi momentin kur dikush bërtiti “Lavdi Ukrainës” – një urim që ukrainasit e kanë përdorur shpesh që nga fillimi i pushtimit rus.
Në atë moment presidenti ukrainas uli kokën dhe u verejte se po luftonte me emocionet. Por ai mori shpejt qetësinë dhe u përgjigj: “Lavdi heronjve”.
The moment when “Slava Ukraini” is being chanted in Congress and Zelensky responds with “Geroyam Slava” holding back tears. pic.twitter.com/vqra4scACi
— Rita (@Riten023) December 22, 2022
Presidenti ukrainas Volodymyr Zelensky mbajti një fjalim të fuqishëm në një seancë të përbashkët të Kongresit Amerikan, në të cilin ai premtoi se vendi i tij nuk do të hiqte dorë kurrë nga rezistenca e tij ndaj agresionit rus.Zelensky gjithashtu shpalosi flamurin e Ukrainës në Kongres.
Presidenti i Ukrainës, Volodymyr Zelensky, u bëri thirrje ligjvënësve amerikanë dhe të gjithë qytetarëve të tjerë të SHBA-së që të vazhdojnë ta mbështesin vendin e tij me ndihmë ushtarake dhe financiare, derisa lufton për ekzistencë kundër një Rusie revanshiste.
Çdo gjë tjetër, përveç fitores së Ukrainës, do të kërcënonte botën e lirë, përfshirë SHBA-në, tha Zelensky.
Ai i bëri komentet gjatë një fjalimi 25-minutësh para Kongresit amerikan, në Uashington.
Ai tha se Ukraina mund ta fitojë luftën kundër një ushtrie ruse të armatosur më mirë, por shtoi se ndihma ushtarake dhe financiare e SHBA-së është “vendimtare” për të arritur fitoren përfundimtare.
Mbrojtja e Ukrainës “nuk është vetëm për jetën, lirinë dhe sigurinë e ukrainasve. Ajo do të përcaktojë nëse [do të ketë] demokraci për ukrainasit dhe amerikanët”, tha Zelensky.
Lufta “nuk mund të ngrihet ose shtyhet, nuk mund të injorohet, duke shpresuar se oqeani ose diçka tjetër do të sigurojë mbrojtje”, tha ai.
Udhëtimi i Zelenskyt në SHBA u bë në kohën kur Kongresi po përgatitet të votojë një projekt-ligj gjithëpërfshirës të shpenzimeve, që përfshin edhe një dispozitë për ndarjen e rreth 45 miliardë dollarëve ndihmë ushtarake për Ukrainën.
Projektligji pritet të miratohet, por mbështetja e SHBA-së për Ukrainën është zbehur, derisa lufta 10-muajshe vazhdon të zvarritet dhe amerikanët ndjejnë barrën e inflacionit të lartë.
