Pas të shtënave me armë zjarri pranë një patrulle të KFOR-it në Zubin Potok, ka reaguar Ministri i Punëve të Brendshme Xhelala Sveçla, i cili këto sulme i quan lojëra të presidentit serb, Vuçiqit dhe instrumenteve të tij kriminale.
“Fillimisht deklaruan se në Zubin Potok ka pasur përleshje të armatosura të iniciuara nga Policia e Kosovës dhe Njësitë e saj Speciale. Mirëpo, kur e kuptuan se bandat kriminale të mbështetura nga vet ai kanë sulmuar KFOR-in, duan t’i mohojnë të gjitha sulmet”, ka shkruar Sveçla në rrjetin social facebook.
Ai thotë se barrikadat duhet të hiqen menjëherë, ndërsa Serbia të ndalojë organizimin dhe mbështetjen e strukturave kriminale ilegale që duan të destabilizojnë Republikën e Kosovës.
“Policia e Kosovës do të vazhdojë të luaj rolin e saj dhe përmbushë misionin e vet. Bëj thirrje tek të gjithë qytetarët që të mos bien pre e propagandës së Serbisë për të nxitur një konflikt të ri dhe të bashkëpunojnë me Policinë dhe organet e rendit”, ka shkruar ministri i Punëve të Brendshme.
Ndryshe, mbrëmë paqeruajtësit e KFOR-it kanë konfirmuar se të shtëna pranë njësitit të tyre në Zybin Potok.
“Në këtë moment mund të konfirmoj se para disa orësh një patrullë e KFOR-it, derisa ishte në detyrë në rrethinën e Zubin Potokut, ka dëgjuar dhe parë disa të shtëna afër tij. Të lënduar nuk ka dhe nuk ka dëme materiale. Tani po i kontrollojmë faktet dhe do t’ju përditësojmë”, thuhet në përgjigje të KFOR-it për RTKlive.
