Presidenti amerikan Joe Biden nënshkroi buxhetin e vendit për vitin fiskal 2023 prej gati një trilion e 700 miliardë dollarë.
Ligji përfshin financime rekord për Departamentin e Mbrojtjes, rreth 858 miliardë dollarë, 10 për qind më shumë nga viti aktual. Përafërsisht 45 miliardë dollarë do të ndahen për të ndihmuar Ukrainën dhe vendet e NATO-s. Kjo është më shumë sesa kërkoi fillimisht administrata Biden nga Kongresi. Sipas buxhetit, vëllimi i ndihmës ushtarake për Kievin do të mbetet afërsisht në nivelin e vitit që po largohet.
Më 21 dhjetor, presidenti ukrainas Volodymyr Zelensky, duke folur në Kongres, u bëri thirrje ligjvënësve amerikanë që të mbështesin dhënien e ndihmës shtesë për vendin e tij. “Paratë tuaja nuk janë bamirësi, por një investim në sigurinë globale, të cilën ne do ta menaxhojmë në mënyrën më të përgjegjshme”, tha Zelensky.
Nga fondet e alokuara për Departamentin e Mbrojtjes, pothuajse 140 miliardë dollarë do të ndahen për kërkime dhe zhvillim të avancuar në fushën e armëve, siç janë, për shembull, raketat hipersonike.
Buxheti parashikon gjithashtu investime në kërkime mjekësore, siguri, strehim të përballueshëm për familjet, veteranët dhe njerëzit e prekur nga dhuna në familje, si dhe fonde për rimëkëmbjen nga fatkeqësitë.
