Mes protestave të vazhdueshme, disa gra iraniane kanë nisur të heqin hixhabin, apo shaminë e detyrueshme të kokës.
Irani u përfshi nga protestat qysh në muajin shtator, kur Mahsa Amini, një grua iraniane-kurde, vdiq në paraburgim. Amini u arrestua nga policia e moralit në Teheran për “thyerje të rregullave” të hixhabit.
Në vitin 1983, Qeveria islamike e Iranit miratoi një ligj, sipas të cilit “gratë që shfaqen në publik pa hixhab fetar, dënohen me 74 goditje me kamxhik”. Megjithatë, dënimet e shkurtra me burg janë më të zakonshme.
Viteve të fundit, gratë që policia iraniane e moralit konsideronte se shkelin ligjet për mbulimin e kokës, u detyruan të merrnin pjesë në leksione për “vlerat islame”.
Pas protestave masive që shkaktoi vdekja e Aminit, Irani – me sa duket – kufizoi patrullimet e policisë së moralit, në fillim të dhjetorit. Që atëherë, një numër i vogël, por në rritje i grave ka nisur të dalë në rrugë pa shami në kokë.
Në disa qytete jashtë Teheranit, kufizimet në veshje – me sa duket – mbeten në fuqi.
